Shillong, Iaiong 02 : Ka Sorkar Jylla kala pyntip ba ki don haduh 72 tylli ki kam tuh, kam bam klop bad ka jingduhnong na ka pisa Sorkar kaba kot haduh T. 1.14 klur kat haduh u Lber 2022 hynrei kam pat don satia ka sienjam ban ai ai jingpynsajia.
Na ka pisa ba kot T. 113.87 lak (1.14 klur), ka pisa ba bun eh ha ka jingbam klop ka dei T. 44.09 lak hapoh ka Meghalaya Legislative Assembly, kiba de jong ki artylli ki case, ong ka kaiphod ka CAG.
Kiwei pat ki kam ba sahteng jong ka jingbam klop, jingduhnong bad jingtuh ka kynthup ia 5 tylli ki kam hapoh ka Tnad Public Works Department kaba kot T. 17.52 lak, kawei ka kam ha Horticulture kaba kot T. 21.06 lak, kawei ha Community & Rural Development ba kot T. 3.03 lak, kawei ha Land Record & Survey ba kot T. 1.56 lak, kawei ha Mining & Geology ba kot T. 16.55 lak, kawei ha Finance ba kot T. 1.94 lak, lai tylli ha Health ba kot T. 0.65 lak bad 57 tylli ki kam ha PHE ba kot T. 7.47 lak.
Kat kum ka Rule 112 jong ka Meghalaya Financial Rules, 1981, kano kano ka jingbam klop ne ka jingduhnong na ka pisa paidbah lane kino kino ki nongkynti kiba shem n aka Government Treasury lane kino kino ki Ophis ne ki Tnad, kiba hap ha ka jingleh audit jong ka Principal Accountant General, dei ban pyntip mar mar sha ka Principal Accountant General, watla ia kane ka jingduh la khyllie pat da ki briew ba donkti.
Nalor kane, ka ong ruh ba ha baroh ki kam tuh, bam klop, thok lane jingduhnong ba iadei bad ka pisa sorkar, dei ban ujor da ka ejahar (FIR) bad ka Tnad Pulit.
