Nongpoh, Ïaiong 02: Ki Nongialam ka Shnong Umlyngkdait (New Tasku) bad ki paidbah ruh kumjuh, kila pynpaw ia ka jingbynniaw kaba jur halor ka jingieh rynghang (bym ker) jong ka Meghalaya Energy Corporation Limited (MeECL) ia u Transformer ha ka shnong-kaba lah ban buh jingma ia ki Khyllung khynnah bad ia ki jingri jingdup.
U Rangbah Shnong ka Umlyngkdait Bah Edwin Syngkli ula pynpaw ba ki bor Shnong ki sngewkhia jur halor ka jingbym kit khia jong ka MeECL ban ker noh ia u transformer hapoh ka Shnong watla ki bor Shnong kila dep pynsngew na ka por sha ka por namar ki jingma kiba lah ban ap ia ki nongshongshnong bad ki jingri jingdup.
Une u Nongialam Shnong u pyntip bay m tang ba ka bor Shnong kala pynsngew ia ki jingma sha ki bor peit ka MeECL hynrei kala dep ruh ban ai da ka jingthoh hynrei haduh mynta kam shym don satia ka jingshimkhia na kane ka Tnad Sorkar.
“ Ka bor shnong ka la pyndep ïa la kamram ban pynsngew sha ki bor ba halor ka tnad MeECL bad ka dei pat ka kamram jong ka ban ai jingïada da kaba ker ïa utei u Transformer” ong u Bah Syngkli haba bynrap “Lada ka tnad MeECL kam shim khia nangne shakhmat ka hap pat ban shim ïa ka jingkitkhlieh lada mih kano kano ka jingjia ba sngewsih hapoh jong ka shnong”.
Ka bor shnong ka dawa ia ka tnad MeECL ba kan shim khia noh ban ker ïa utei u Transformer hapoh ka shnong khnang ba kan long ka jingshngain ia ki nongshongshnong.
