Tura, Lber 30 : Katba ka jingiatai ka dang thnem bha halor ka jingpyntreikam ia ka Roster System ha ka Job Reservation Policy ka Jylla, ka seng Garo National Council kala kam ba dei u President jong ka, uba la wanrah nyngkong eh ia ka Resolution ha ka Iingdorbar Thaw Ain ban pyntreikam ia ka Roster System hynrei kala shah rem da ka jingiathep vote hadien ba ka Sorkar Congress ba ialam da u Dr Mukul Sangma, kam shym la ailad ban iakren halor kane ka kam.
“U (L) Clifford Marak, MLA barim, ula wanrah shisien ia ka Resolution ha Iingdorbar ban pyntreikam ia ka Roster System ha ka Meghalaya Reservation Policy, hynrei ka Sorkar barim hapoh ka jingialam u Dr Mukul Sangma kum u Myntri Rangbah kala pynrem ia kane ka Resolution ha Iingdorbar khlem da iatai satia ia ka” pynbna u Augustine R Marak, General Secretary ka GNC.
Ka GNC kaba lamkhmat ha ka jingdawa Garoland, kala ong ba ka dei ka GNC kaba la tynruh ban pyntreikam ia ka Roster System ban pynthikna ia ka Job Reservation Policy kaba treikam kat kum ka bhah, kaba dei ban urlong naduh ba sdang pyntreikam ia ka policy.
“Ka jingpynreikam ia ka Roster System ha Meghalaya kam dei ka Policy ba dang thymmai. Kane ka System ka dei kaba la pyntreikam ha kiwei kiwei ki Jylla ka Ri kum ka Madhya Pradesh bad Karnataka kaba don ia ka Reservation Policy” ula ong.
“Ka Roster System ka dei kaba kongsan ha ka Reservation Policy, ka pynlong ia ka Policy kaba beit ba ryntih bad ka Iingkashari Meghalaya High Court kala sngew ia kaba dei eh ba donkam ia ka Roster System ha ka Meghalaya Job Reservation Policy…ta ka daw ngi baroh ngi hap ban burom lang” ula bynrap.
Ka GNLC kala pynshai ba ka jingpyntreikam ia ka Roster System kam dei sati aka jingpynduh ia ka hok jong kino kino ki Jaidbynriew riewlum ka Jylla Meghalaya.
“Ngi dei ban pynneh kumba ka long (status quo) ha ka Meghalaya Job Reservation Policy 1972 bad ia ka Roster System. Ka Sorkar ba mynta kam dei ban shu iai sngap ia ki jingiatai halor ka Roster System bad ka Job Reservation Policy namar kane ka kam ka dei kaba jyrwit jyrwat bha” maham ka GNC.
