Shillong, Lber 30: Ki bor pyniaid District ka East Khasi Hills hynne ka sngi Palei kila rai ban pynthikna ba ka jingpynlong iaka elekshon ha Sohiong constituency kan long kaba iaid beit bad kaba jai jai da kaba pyntreikam iaka Code of Conduct bad Prevention of Defacement of Public and Private Properties ne pynsniewdur ia ki nongkynti ka Sorkar ne shimet, da baroh ki kyrtong ne ki seng saiñ pyrthei hapoh jong ka district.
Ka jingthep vote kan long haka 10 tarik u Jymmang bad ka jingniew vote kan long ha ka 13 tarik u Jymmang 2023.
Katkum ka hukum kaba la pynmih da ka District Election Officer (DEO) kala mana ia baroh ki kyrtong, Agent bad ki seng saiñ pyrthei ban thoh ia ki jingthoh ha ki kynroh, ban tah postar, ne ban pynsniewdur da kaba pynieng ne buh ia ki jingthoh, ki banner bad kiwei kiwei ha kino kino ki jaka sorkar.
Ki seng saiñ pyrthei ne ki kyrtong ki lah ban buh ia ki banner ha kylleng ki surok hynrei ym shah pat ban thoh eiei ha ki kynroh, ban tah postar ne ban pynsniewdur da kaba pynieng ne buh ia ki jingthoh ne ki banner ha ki jaka jong ki riew shimet lada kim pat ioh shwa iaka jingbit na ki trai iing bad iaka jingai jingbit kaba khatduh na ka ophis jongka DEO.
Yn ym shah ban pynlong iaka jingialang elekshon khlem da ioh jingbit shwa naka ophis bad kumjuh iaka jingbit na ki Rangbah Shnong ha kaba iadei bad ka jaka ban pynlong ia ka jingialang bad yn ym shah ban pyndonkam ia ki kor pynsawa ia ki sur naduh ka por 10 baje mynmiet haduh 6 baje mynstep.
Lada don ka jingpyndonkam iaki PA System/Loud Speakers khlem da ioh jingbit na ka ophis, yn kurup ia kitei ki tiar pynsawa sur da ki bor kiba dei khmih. Yn ym shah ban pynlong iaka Rally ne Proseshon khlem ba ioh jingbit shwa naka ophis kaba dei khmih.
Ki bor pyniaid district kila mana ruh ia kino kino ki briew ne kynhun ban rah iaka pisa palat iaka T.50,000 hapoh jong ka East Khasi Hills District.
La iathuh, ba la ioh ia ki jingtip ba ki don katto katne ki briew kiba lah ban rah bun iaka pisa ban pynngop ia ki paidbah ba kin thep iaka vote ka jongki na ka bynta jong u kyrtong.
Lada shah kum ia katei, kumta kan ktah jur ban pynlong ia ka elekshon kaba khuid ba suba hapoh Sohiong constituency bad ka lah ruh ban pynmih iaka jingbitar, ka jingiakynroi bad jingiashoh hapdeng ki paidbah, kaban ialam pat sha ka jingpynthud iaka shongsuk shongsaiñ bad kan pynmih ruh iaka jingduh wat ia ki mynsiem briew bad ia ki jingdon jingem, la ong ha ka hukum.
