Nongpoh, Lber 30: U Myntri Sorkar Bah AL Hek hynne ka sngi Palei u la leit ban plie paidbah ia ka jaka recharge ia ki kali elektrik kaba nyngkong eh ha ka jylla kaba la tip kumta kata ka Electric Vehicle (EV) Fast-Charging station ha ka jaka thep umphniang jong ka Bharat Petroleum Corporation Limited (BPCL) kaba don ha Jorabat.
Ia katei ka jaka recharge kali kaba 30KW la plie ha ka jingiadon ryngkat u Additional Deputy Commissioner ka Ri Bhoi, u Bah MB Tongper, u State Head Retail jong ka BPCL North East, u Pankaj Das, u DGM Retail Initiative jong ka BPCL, u Debashish Das, u Territory Manager (Retail) jong ka Shillong BPCL, u Indranil Banerjee, u trai katei ka jaka thep umphniang, u Shripal Jain lem bad u trai ka M/S Bimal Cars Dealers jong ka Tata Motors.
Haba kren ha kane ka sngi, u Bah AL Hek u la ai ka jingiaroh sha ka kompani BPCL halor ka jingplie paidbah ia kane ka jaka ban recharge ia ki kali kiba pyndonkam da ka bording ilektrik lane kita ki electric vehicle da kaba ong ba kan iarap shibun ban pynduna ia ka jingpynjaboh ia ka lyer (pollution) hapoh ka jylla.
U la ong ruh kumba ka jylla Meghalaya kadei kaba bna nam halor ka kam jngohkai pyrthei, kane ka sienjam khlem pep kan wanrah shibun ka jingmyntoi na ka bynta ka mei mariang bad ruh kan kyntiew ia ka kam jngohkai pyrthei hapoh ka jylla.
U State Head Retail jong ka BPCL North East, u Pankaj Jain u la iathuh ba ka BPCL kala dep ban plie paidbah kumba 17 tylli ki jaka ban recharge ia ki kali ilektrik ha ki lai tylli ki surok bah kiba kham donkam jong ka thain shatei lam mihngi ba kynthup ha Guwahati sha Dibrugarh, na Guwahati sha Serampore bad na Guwahati sha North Lakhimpur.
U pyntip ba shen ka kompani kan sa plie ia kine ki jaka recharge ia ki kali elektrik ha Nongpoh, Mawiong, Shillong, Jowai bad ha kiwei kiwei ki jaka.
