Shillong, Lber 30: U Myntri khynnah ka sorkar pdeng ba khmih iaka tnat kam pohïing uAjay Kumar Mishra hynne ka sngi Palei, ula wan iashim bynta haka 51st Passing out Parade jong ki Pulit kiba ioh ia ki jinghikai pyntbit ha North Eastern Police Academy (NEPA).
Ha kane ka sngi kila don haduh 189 ngut ki Pulit kiba la pyndep iaka jingshah pyntbit ha ki kyrdan bapher bapher.
Ka 51st Basic Course ka kynthup 25 ngut ki Deputy Superintendent of Police (DSP) ba kynthup 2 ngut na Nagaland, 8 ngut na Tripura, 15 ngut na Arunachal Pradesh, 164 ngut ki Sub Inspectors (SI) ba kynthup 1 na Tripura, 94 ngut na Arunachal Pradesh, 69 ngut na Assam, bad na kine ki 189 ngut, ki ophisar riew kynthei ki don haduh 12 ngut.
Haba kren ha kane ka sngi u Ajay Mishra ula ai khublei ia baroh 189 ngut ki Pulit kiba la pyndep iaka jingshah pyntbit bad ula kyntu ba kin dang iaid shakhmat hala ki kam iaka ban shah bynshet ha ki sngi ban wan.
U Mishra ula ong ba kane ka jinglah ki 189 ngut ki Pulit ban pyndep iaki jingshah hikai pyntbit ka paw shai iaka jinglah ka Academy kata ka NEPA haka jingkhmih u Deepak Kumar u ba dei u Director, ban pyndonkam hok iala ka kamram kata ban hikai iaki Pulit kiba wan shah hikai pyntbit ialade.
“Ki Ophisar kiba la pyndep iaka jingshah hikai pyntbit, kila prat lynti ialade lyngba kane ka Passing out Parade bad kila kut jingmut kumno ban leh naka bynta ban kyntiew iaka ri baroh kawei” la ong u Mishra.
U Mishra ula ong ba ka thain shathei Lam Mihngi ka dei ka thain kaba itynnad bha bad watla kadei ka thain kaba don bun ki jaitbynriew hynrei kadei ruh ka thain kaba ieng tylli naka bynta ban iakhun iaki jingeh ban kyntiew iaka thain bad iaka ri.
Ula ong ba u Myntri Rangbahduh ka ri India Narendra Modi ula trei shitom naka bynta ban wanrah ki kam pynroi hapoh ka thain shathei lam mihngi (North East) lyngba ki kam pynroi ba kynthup ki lynti Rel, ki Kad Lengsuin, ki jingiarap ban kyntiew iaka rep ka riang bad kiwei kiwei de.
Shuh shuh u Mishra ula iaroh ruh iaki pulit ka ri India baroh kawei lyngba ka jinglah jong ki ban wnarah iaka shong suk shong shngain ha kylleng ka ri India bad ka jinglah jong ki ban tohkit ia kino kino ki kam bymman hapoh ka imlang sahlang.
