Aizawl, Lber 30 : Ki shipai Assam Rifles mynta ka sngi ki la ioh ban kurup haduh 235 song ki sikret bar ri kiba shongdor haduh T.3.525 klur napoh ka jaka shong jong ki phetwir (refugee camp) ha Zokhawthar hapoh Champhai district ka Mizoram.
Ia kine ki sikret bar ri la ioh ban kurup noh da ki bor shipai ka Assam Rifles ha ryngkat ki dkhot na ka tnat Customs Preventive Force.
Katei ka kynhun ka la lapdien ia kine ki sikret ba la buhrieh ha ka jaka shong shnong hapoh katei ka ktem sah phetwir ha Zokhawthar hajan khappud ka India – Myanmar, ong ka lad pathai khubor.
Ia kine ki mar ba la ioh kurup la aiti noh sha ka tnat Customs Preventive Force na ka bynta ban leh ia kaba donkam.Kine ki kam khaii beain ha Mizoram ki la wanrah ka jingsngewkhia kaba jur bad na ka liang ka tnat shipai Assam Rifles ka la ioh ia ka jingjop lyngba ka jinglah ka jong ka ban khanglad ia kiba bun bah ki kam khaii beain.
Ha ka 15 tarik mynta u bnai, ki shipai Assam Rifles na ka Serchhip Battalion jong ka 23 sector ki la ioh ban kurup haduh 60 synduk ki sikret beain kiba dei na shabar jong ka ri kiba shongdor T.90 lak na ki bynta jong ka Zokhwthar hapoh Champai district.
Kane ka jingioh kurup ka la wan long ruh lyngba ka jingiatreilang hapdeng ki bor shipai ka Assam Rifles abd ka tnat Custom na Champhai district.
