Sub-Aiti ia ka kaiphod hapoh ka 31 tarik Risaw
Shillong, Risaw 14 : Ka bor district ka East Khasi Hills kala hukum ia ka jingtohkit magistrate halor ka jingkynnoh khrong pisa beain daki Pulit ha ki check-post, kaba la sei madan da ka jingkhynra jong ka Khasi Students Union (KSU) dang shen.
U Deputy Commissioner Abhilash Baranwal ha ka sngi Balang ula ong ba katba ki Pulit kila aiti ia ka kaiphod jong ki, ka jingtohkit ba laitluid ka long kaba donkam ban sngap ia baroh ki liang.
“Ngi la thung ia ka jingtohkit magistrate halor kaei kaba jia, ki video kiba baroh kila iohi. U SP ka East Khasi Hills ula dep ban aiti iala ka kaiphod. Ka kaiphod na ki Pulit ka ai tang ia kawei ka liang jong ki Pulit” ong u Baranwal.
U iathuh ba la bynshet ia ka jingtohkit ha u senior Additional District Magistrate bad la aipor ia u ban aiti ia ka kaiphod kaba slem eh hashuwa ka 31 tarik Risaw.
U DC u iathuh ba ka jingtohkit kan shong bishar ia ki statement jong ki nongujor, ki Pulit bad ki trok.
“Kane ka jingtohkit magistrate kan shim ia ka statement na ki nongujor, na baroh kito kiba la leit sha ki check-post, kito ki pulit constable bad lehse na ki trok. Baroh ki kynhun, kiba sngew donkam ban khot hajir bad kylli jingkylli, ka jingtohkit magistrate kan pynthikna ba kan long ha ka lynti kaba dei bad kaba bniah, bad kan wanrah ia ka jingshisha ban tip mano ba bakla” bynrap u Baranwa
