Nongstoin, Risaw 14: Ka Hynniewtrep Youths Council-Nongstoin Circle, ha ka sngi Balang, kala leit ban leh ia ki bar Jylla kiba shna pandal ha phyllaw ka MCH Hospital.
Ia kane ka kynhun la ialam da u Vice President samla Alivertwis Marngar kaba kynnoh ba kine ki bar jylla, kiba don kumba 6 ngut, kila wan trei khlem ki kot ki sla kiba biang.
Kane ka jingkhynra ka long shibynta jong ka Sier Lapalang Operation ka HYC.
Ka HYC kala kynnoh ba kine ki bar jylla kila wan shna ia ka pandal ban plie ia ka MCh hospital lashai ka 15 tarik Nailur da u Myntri Rangbah ka Jylla.
“Ka seng ka pdiang sngewbha ia ka jingwan ka roi ka par hapoh ka thain, hynrei kan nym shah ban phah trei ia ki kam da ki briew kiba nabar” kala ong.
Ka HYC ka ong ba ia kum kine ki jait kam (shna pandal), ki paradoh parasnam kila lah ban trei hynrei balei ba ka Tnad ka donkam ban phah trei ha ki bar jylla. Ka ong ba kane ka jingailad ia kiba nabar ka pynduh mynsiem bad tuh noh ia ka hok jong ki paradoh parasnam, ki samla ka dong ka thain kiba don ka sap ban trei ia kane ka kam.
Ka HYC kala maham ruh ba nangne shakhmat da lei lei kan ym shah ban wanrah ia ki nongtrei kiba nabar ba kin pyntrei ia ki kam kiba lah ban pyntrei da ki jong lade ki paradoh parasnam. Ka seng ka maham ruh ba kan ym shah ia kino kino ki contractor ba kin wan rah nongtrei bar jylla sha ka dong ka thain khlem ki kot ki sla ba biang.
