Shillong, Risaw 14 : U Myntri Rangbah ka Jylla Conrad K Sangma ha ka sngi Balang, ula batai ia ka thong jong ka Jylla ban tih par kat kum ka jingstad saian bad ban kyntiew ia ka ioh ka kot kaba neh, ha ka jingrakhe dap 10 snem ka Distrct Mineral Foundation (DMF) ha ka jingtreikam jong ka.
U Conrad ula kren halor ka bynta jong ka kam tih par ha ka ioh ka kot ka Jylla bad ban jur ia ka jingdonkam ban kynshew biang iaka pisa ba iohlum na ki marpoh khyndew sha ka roi ka par jong ki shnong ki thaw bad ki lad kamai jakpoh kiba neh slem.
Haba thoh ha X, u Conrad ula ong “Ka kam tih par ka dang iai long u rishot ba kongsan jong ka ioh ka kot ka Jylla, kaba pynmih un bah ka pisa bad kyrshan ia ka kamai jakpoh jong ki hajar ngut ki briew jong ngi. Kum kawei na ki lad aikam aijam kaba heh duh, kane ka kam ka dei hok ban ioh ia ka jingkyrshan jong ngi katba ngi pynkylla ia ka sha ka jingtih par kaba shngain, kat kum ka jingstad sain bad kaba neh slem, kaba iahap bad ka rukom long ki jaka hangne bad ka rukom long trai ia ka khyndew ka shyiap”.
Haba kren halor ka jingjop jong ka DMF ha kine ki 10 snem bala leit, ula ong “Kawei pat ka mat kaba kongsan ka long kumno ngin pyndonkam biang ïa kaei kaba ngi ïoh na ka kam tih marpoh khyndew.”
U la pyntip ba ka foundation ka la lah ban lum haduh ₹181 klur ha Meghalaya bad ka la mynjur ïa 923 tylli ki projek, na kiba 542 tylli la dep ban pyndep.
Kine ki projek kiba la dep ki kynthup ïa ki kamra klas, ki jaka ai jingsumar, ki rukom sam um dih, ki jingkieng iaid kjat ba lah ban kyrda ia ka lyiur bad ki kam ban pynbha biang ïa ka mariang, kum ki jingiada ia ki dam um bad ka jingthung dieng ha ki par tih marpoh khyndew.
U Sangma u la wer ban pyrkhat kham bha ha ka ban thaw ïa ki jingtei kiba neh slem bad ki lad kamai jakpoh kiba lah ban bteng lyngba ki projek kiba bei tyngka da ka DMF.
“Ka sienjam kaba bud ka long ban pyndonkam ïa ka DMF ban tei ïa ki jingdon jingem kiba neh slem bad ban thaw ïa ki lad kamai jakpoh kiba lah ban bteng. Ki distrik jong ngi ki la dep ban pyni ïa ka lynti, lyngba kawei ka ecotourism park bad ka unit pynmih mar na ka umngap ha Nengmandalgre, ka jingri khñiang ryndia bad ka centre thaiñ jaiñ ha Ri Bhoi, lem bad ka district emporium ban pyni nam ia ki mar,” u la ong.
U la bynrap ba ka jingkynshew kham bun ha ka kam jngohkai pyrthei, ka food processing bad ka jingsengkam ki trai jylla kin ïarap ban “pynkylla ïa ka spah marpoh khyndew jong ngi sha ka ïoh ka kot kaba pynmih ïa ki lad ki lynti na ka bynta ki pateng ban wan.”
Haba pynkut ïa ka khubor jong u, u Myntri Rangbah u la kyntu ïa ki bor pynïaid distrik ban pynthikna ia ka jing pyndonkam hok ïa ki pisa jong ka DMF bad ban pyndep ïa ki projek ha ka por kaba la buh.
