Shillong, Lber 21 : U Myntri Rangbah ka Jylla Conrad K Sangma hynne ka sngi ba-ar, ula kular ba ka sorkar jylla kan sa shong bishar ia ka kam ba iadei bad ka jingdawa thungkam pura (regularize) ia ki nonghikai ha ki skul Lower Primary ki bym dei jong ka sorkar.
“Ngin sa shong bishar ia ka kam khnang ba ngin lah ban shim ia ka sienjam kaba dei” ong u Conrad hapoh ka Iingdorbar Thaw Ain.
U Conrad ula ong ba ka Sorkar Meghalaya Democratic Alliance-I, kala lah ban pynbeit ia kane ka kam, kaba la sahteng la 30 snem, da kaba thungkam pura ia palat 461 ngut ki nonghikai jong ki skul Lower Primary kibym pyniaid da ka sorkar. Kine ki nonghikai ki dei kiba la thungkam da ki Administrator/ Deputy Inspector of School shuwa u 2007.
Shuwa ia kane, u Myntri ka Tnad Pule Puthi Rakkam A Sangma ula pyntip ba 1985 ngut ki Nonghikai jong ki skul Lower Primary ka Sorkar la dep ban thungkam pura.
Haba u MLA ka UDP na Nongpoh Bah Mayralborn Syiem u kwah ban tip ia ka lawei jong ki nonghikai ha ki skul Lower Primary bym dei jong ka sorkar kiba la shah ieh shadien, u Rakkam ula ong ba um don satia ia ka jingtip hynrei ia kane ka mat bala kdew, ula buh jingthoh bad un sa shong bishar ia ka.
U Bah Mayral ula kyntu ia u Myntri ban khmih ia kane ka kam kaba iadei bad kine ki Nonghikai.
