Shillong, Lber 21 : U Symbud Myntri Rangbah ka Jylla Bah Prestone Tynsong hynne ka sngi ba-ar, ula pyntip ba ka surok na Umshyrpi sha Banium, kaba hap hapoh ka package-I jong ka Shillong-Dawki road project, ka dang don hapdeng ka jingkhot tender thymmai.
Haba jubab ia ka jingkylli bala wanrah da u MLA ka Congress na Mylliem Bah Ronnie V Lyngdoh, u Bah Prestone ula pyntip ba ka company kaba ioh shimti nyngkong ia ka kam bala ai da ka Ministry, kala iehnoh shiteng ia ka kam.
“Ha u bnai Lber-Iaiong 2022, nga la leit hi dalade sha Delhi bad iakynduh ia u Secretary ka Ministry bad iakren sani bha bad u halor kane ka kam bad dei namar kata, la rai ban khot tender biang. Hynrei tang kawei ka company kala iashimbynta, kaba la pynlong ia ka Ministry ban khot thymmai bad nga thikna ba hapoh u bnai Iaiong, kane ka kam kan dep noh bad ka jingpyntrei ia ka surok kan sdang biang” ong u Bah Prestone hapoh ka Iingdorbar.
Ula pyntip ruh b aka jingpynkynriah ia ki tiar ki tar ka dang iaid shakhmat bad ong “Ngi la shong jingialang ha ka kyrdan jong nga bad jong u Chief Secretary ha kaba ngi la peitngor 24×7 namar ia ka jingpynkynriah ia ki tum ki tam hap ban pyndep noh kham kloi kat kaba lah shuwa ka 15 tarik Iaiong.
Haba iadei bad ka package-5 bad package-3 jong ka project, u Symbud Myntri Rangbah ula ong “Ia ka package 5, ka kam ban khot tender biang kala don ha ka khep ba khatduh hadien ba ka company kala iehnoh ia ka kam bad ia ka package-3 pat, kaba dei ka by-pass jong ka Pynrusla, ka NHIDCL ka dang pynkhreh ia ka Detailed Project Report (DPR) hadien ba ki trai jaka bad ki Khlieh Nongsynshar kila rai ban nym pyrshah satia ia ka by-pass”.
U Bah Ronnie haba wanrah ia ka jingkylli bynrap, ula pynpaw ia ka jingsngewkhia halor ka jingdheng kali ha shilynter ka surok kaba la ktah jur ia ki nongshongshnong ka Upper Shillong bad kiwei ki bynta jong ka Jylla haba kyrpad ia ka Sorkar ban pynsted noh ia ka jingpyntrei ia ka Western Bypass ban lah pynduna ia ka jingeh.
Haba jubab ia kane, u Symbud Myntri rangbah ula ong ba ka kam jong ka Western Bypass ka la poi ha u pud ban iathied jaka bad ong “Nga thikna ba lada ki kam ki iaid beit hapoh ka 3 bnai, ngin sa lah ban aiti ia ka jaka sha ka company ba kan lah sdang noh ia ka kam”.
Ha kajuh ka por, u Symbud Myntri Rangbah ula pyntip ba ka jingpyntrei ia ka package-2 kala poi haduh 37.7% bad ka package-4 kala poi 30.10%.
