Shillong, Lber 18 : U President ka Voice of the People Party (VPP) Bah Ardent M Basaiawmoit hynne ka sngi saitjain, ula ong ba ka party jong u, ka buh thong ban thaw Sorkar dalade ha u 2028. Ula ther ruh ia ki Nongialam jong ki seng sain pyrthei halor ka jingshet kylla, kaba lam sha ka jingkutlad ban thaw ia ka Sorkar ba ialam da ka seng riewlum.
U Bah Ardent uba dei u MLA ka Nongkrem, ula kam ba ka jingjop bym poi pyrkhat jong ka VPP kala buh jingma ia ka National People’s Party (NPP) kaba don ha ka liang synshar ha Jylla.
Haba kren ha ka ‘Rally sngewnguh’ bala pynlong da ka VPP ha madan Polo, une u Nongialam ka VPP ula ong “Ngi la lah ban pynwandur ia ka party ha ka rukom kaba ai jingkyrmen ia ki paidbah bad ngi kwah ia phi ban tip ba kum ki nongialam, ngim don satia kano kano ka jingthmu ban ioh jingmyntoi shimet hynrei ka thong ka long ba ngin kynjoh ia ka thong ha u 2028 ba ka VPP kan thaw ia ka Sorkar da lade”.
Hynrei ula ong ba ka VPP kan nym lah ban kynjoh ia kane ka thong lada ka shim ia ki rai kiba bakla.
Haba pynpaw ba ka Jylla ka la dei ban ioh ia ka sorkar ba ialam da ka seng riewlum, u Bah Ardent ula ong “Hynrei phi la iohi ia kaei kaba jia. Kiwei ki seng sain pyrthei kila shet kylla ia ngi bad ngim shym la lah ban thaw sorkar. Namar kata, ngi la rai ban shong noh ha ka Liang Pyrshah”.
“Ngi kwah shisha ia ka Sorkar kaba ialam da ka seng riewum bad ngi la buh palat 15 tylli ki kyndon hynrei ngi la pynduna noh da kaba ong ba katba lah ban pynduh ia ka NPP ba kan wan ha ka bor, ngi long kiba la khreh wat ban ai ka jingkyrshan na shabar hynrei kim long satia kiba kloi ban sngap” ula ong haba bynrap “Kine ki dei kijuh ki party kiba kalm ba ki don ia ki nongialam kiba khlain hynrei haba iakren bad ki lad pathai khubor kila ong ba ka UDP kan ialam nakhmat, ngin la shu rai ban iabud”.
