Shillong, Lber 17 : Ka Sorkar Meghalaya Democratic Alliance-2 (MDA-2) kala rai ban wanrah noh ia ka Captain Williamson Sangma Technical University (Amendment) Bill hapoh ka Dorbar Mang tyngka ka Jylla, ban lah pynkylla noh sha ka Captain Williamson Sangma State University.
Kane ka rai kala mih na ka jingialang jong ka Kynhun Myntri kaba iakynduh hynne ka sngi Thohdieng, ban weng noh ia ka jingeh jong ki samla pule haba iadei bad ka Common University Entrance Test (CUET).
The Capt. Williamson Sangma Technical University Amendment Bill which proposes to change the University to Meghalaya’s 1st State University i.e the Capt. Williamson Sangma State University will be placed on the table of the Assembly.@dpradhanbjp pic.twitter.com/TY3ZpiKmAy
— Conrad K Sangma (@SangmaConrad) March 17, 2023
Haba iakren bad ki nongthoh khubor, u Nongaiktien ka Sorkar Bah Paul Lyngdoh ula ong ba ka Sorkar kan sa wanrah noh da ka Bill ha Iingdorbar Thaw Ain ban pynkylla ia ka Captain Williamson Sangma Technical University sha ka State University.
“Ka Kynhun Myntri kala iakren mynta ka sngi ia ka kam ban seng noh iaka State University ba nyngkong eh ha ka Jylla. Ta ka daw ngi la wanrah ia kane ka kam sha ka jingialang jong ka Kynhun Myntri bad mynta ia ka Captain Williamson Sangma Technical University yn sa tip noh da ka Captain Williamson Sangma State University” ula ong.
“Naba kane kan dei ka State University ba nyngkong eh, ngin tyrwa ia ki lain pule ha ka Higher Education, haka lain Commerce, General Science, Engineering, Physical Science, Life Science, Technologies bad kiwei kiwei” ula bynrap.
Haba pynpaw ba ia kane ka jingtyrwa la dep ban mynjur ruh da ka Tnad Ain, ka Tnad Finance bad ka Tnad Personnel, u Bah Paul ula ong “Ka kam jong ngi mynta ka long ban pyrshang bad pynkhlain ia ki Tnad bapher bapher khnang ba ka University kan long kaba jop”.
U Bah Paul ula pyntip ba shisien ba kane ka State University kala treikam, ka jingpyniasoh jong ki college kan sa sdang noh. Ia mynta, baroh ki college ha Jylla kila iasoh bad ka North Eastern Hill University (NEHU).
Halor ka jingkylli balei ba ka Sorkar kam buh ia ka State University hapoh ka Nongbah ka Jylla, une u Myntri Sorkar ula ong “Ka nongrim hangne hi ka long ba ngi la don lypa ia ka Technical University ha Tura, namar kata, ka jingpynkynriah ia ka sha Shillong kan sa nang shim por. Khnang ban ngin ioh noh mardor ia ka State University, ngi la shu pynkylla ia ka Technical University khnang ba ngin lah ban pynkut noh ia ki jingeh kaba phi la kdew kum ka CUET bad kiwei kiwei”.
Ha kajuh ka por, u Commissioner & Secretary in-charge ka Tnad Pule Puthi BDR Tiwari ula pyntip ba iaka por ba ki samla kin pynrung kyrteng ha ka CUET la pynjlan mynta sha ka 30 tarik Lber ha ka jaka jong ka 12 tarik Lber.
