Shillong, Jylliew 29: Ka All India Congress Trinamool (AITC) kala pynpaw ia ka jingsha-iong bad jingsammut ban iohi baka BJP bad ka Congress, kila iatreilang ha Meghalaya.
“Tang ka Jylla Meghalaya na ki Jylla hapoh ka Ri kaba la sei pyrthei ia ka jingiadei bym shong hok hapdeng ka BJP bad ka Congress” ong u Abhishek Banerjee, National General Secretary ka AITC haba kren sha ki nongkitkam ka AITC ha ka jing ialang pynrung dkhot hynne ka sngi ha Shillong.
U Abhishek ula ong “Ym sngew lah ngeit ba 5 ngut ki MLA ka Congress, 2 ngut ki MLA ka BJP bad ki MLA ka NPP kila iatreilang ban synshar ia ka Jylla” .
Haba pynpaw ba kila thad madan dalade ialade, une u Nongialam ka AITC ila ong “ Hangne ka Congress ka kyrshan ia ka BJP, ka BJP ka kyrshan ia ka Congress , ka NPP ka kyrshan ia ka Congress bad ka BJP” haba ong “Kaei ka bym sngewthamula ia ka Party kaba iakren ban iakhun pyrshah ia ka BJP”.
Une u Nongialam ka AITC ula ai khublei ia u Nongialam ka Liang Pyrshah Dr Mukul Sangma, ia u President ka AITC Meghalaya Bah Charles Pyngrope bad ki 10 ngut ki MLA kiba la phet na ka Congress bad wan pyniasoh sha ka AITC.
“Ki sngewthuh ba lada ngi dei ban iakhun ia ka bor jong ka NPP bad ka BJP, ngi donkam ia ka rynsan bad ka party kaba shlur ban kren bad ban iakhun khlem riej ia ka BJP” ula ong.
