Nongstoiñ, Lber 13: Ka Hima Nongmynsaw hynne ka sngi, kala leit ban ujor sha u Deputy Commissioner ka West Khasi Hills, halor ka jingkynnoh ba ki briew jong ka Sorkar Assam, ki thmu ban wan kem jubor ia u Sordar ka Shnong Umbah, kaba don ha ka thain Kyrshai.
Kat kum ka jingiathuh jong ki, kane ka jingwan pynibor jong ki briew ka Sorkar Assam kala jia ha ka 6 tarik Lber. Ki iathuh ba u Bah Biliroi Samakha, Sordar ka Shnong Umbam, ula shah pyndik ha uwei u Ophisar ka Tnad Forest jong ka Sorkar Assam, uba treikam na ka Ophis kaba don ha Ukiam.
Ki Nongialam ka Hima, kila iathuh ba ha katei ka sngi, une u Ophisar na Assam, ula leit khot ia u Bah Biliroi na Iing ban leit sha ka Ophis jong u ha Ukiam bad ha lynti, une u Ophisar ka Assam ula tohkit ia une u rangbah halor ka jingkynnoh ba u pom dieng. Ki ong, haba une u rangbah ula kyntait, une u Ophisar ula wad daw da kaba kylli sa ia ki kot pata kiba dei na Assam.
Namar ka jingpynksan ba u don ia ki kot pata na Meghalaya, une u Ophisar ka Assam ula phone ia u OC ka Langpih BOP ban phah kem ia une u Sordar Shnong bad ha kane ka por, une u Sordar ula iaksaid ban ula lait phet da ka said bad wan rieh noh sha la ka jong ka Shnong bad ban pyntip ia kane ka jingjia sha u Acting Syiem ka Hima Nongmynsaw ba un ai jingiarap.
Ki ong ba hadien kane ka jingia, une u Ophisar ka Assam ula phah thwet man ka sngi ia une u Nongialam Shnong.
Halor kane ka jingjia, ka Hima kala iakynduh ia u DC bad dawa ba un tuklar mardor ia kane ka jingjia bad ban iakren ruh bad ki bor pyniaid District ka Kamrup ban ym pyndik satia ia ki nongshongshnong ha khappud ne ban pynthut ia ka shongsuk shongsain jong ki paidbah nongshongshnong.
