Shillong, Lber 13 : Ka Iingkashari Meghalaya High Court hynne ka sngi nyngkong, kala bthah ia ka Sorkar Jylla ban leh tyngeh ia ki briew kiba donkti ha lynti ka jingseng ia ki karkhana coke ba beain, kat kum ka lynti jong ka ain.
“Lada ia ki briew ba donkti la tip bha, la khmih lynti ba ka Jylla kan leh eiei pyrshah ia ki kat kum ka lynti ka ain” ong ka Iingkashari bala khlieh da u Sanjib Banerjee ha ka hukum bala pynmih halor ka PIL bala mudui da u Shailendra Kumar Sharma.
U DGSI Dr Mozika ula pyntip ia ka Iingkashari ba hadien bala pynmih ia ka hukum ban khang tala ia ki karkhana coke ba beain, ki briew kiba sdang ia ka jingtreikam beain lehse ki la pynsangeh iakiba bun ki karkhana coke hynrei ki nongshong shnong ka thain lane ki nongtrei ki la shimti ban pyniaid kam.
U Dr Mozika ula ai jingmut ba ka jingithuh ia ki briew ba ialam (kingpin) kam dei kaba eh ban ithuh namar ki dei kiba bun ki tip bad ithuh ia ki.
U Advocate General ula pyntip ba ka Jylla kala phah ia ka kynhun tohkit ban wad ia ki briew ba pyntreikam beain bad ban pynngat ia ki ha ki kyndon jong ka ain.
Ka Iingkashari kala buh ban bishar biang ia kane ka kam ha ka 9 tarik u Jymmang.
