Shillong, Lber 10 : Ki Pulit ka East Jaintia Hills, kila kem haduh 13 ngut ki briew kynthup ia 3 ngut ki Nongtrei ka Meghalaya Energy Corporation Limited (MeECL) namar ka jingdonkti ha ka jingleit wiang ding ia ka Iingsah jong u Rangbah Shnong barim ka shnong Rymbai, East Jaintia Hills District.
Kane ka jingjia kala jia ha ka 8 tarik Lber ha ka jaka bala tip kum ka Rymba Iawpynsin.
Ha kane ka jingjia, ki paidbah kila ioh kem ia u Deishim O Lamurong ba na Rymbai Shynrang Sakhain ha ka por ba u dang wiang ding ia kane ka Iing katba ki paralok jong u pat, kila ioh phet krad da kaba shim kabu ia ka jingdum jong ka miet, ong u Superintendent of Police Jagpal Singh Dhanoa.
Ula iathuh ruh ba uwei u briew bala tip kyrteng u Heisalon Dkhar ba trei hapoh ka MeECL Control Room u dei uba la suba jur ba iadonkti ha kane ka jingjia namar ka jingpynlip ia ka bording ha kane ka Iing shuwa ka jingwiang ding.
Ki Pulit kila register case halor kane ka jingjia bad ha ka jingtohkit, kila lap ksai shuh shuh ia ka jingdon kti jong kiwei pat ki briew.
Une u Heh Pulit u pyntip ba haduh mynta, ki Pulit kila kem haduh 13 ngut ki briew bad kine ki dei u Heisalon Dkhar (33) na Rymbai Synrang Sakhain, Elius Wanniang (40) na Mawkyrwat bad Rishotlang Bareh (31) na Khimmusniang, Jowai kiba dei ki nongtrei ka MeECL.
Kiwei pat ki dei u Deishim O Lamurong (26), Bakstar Dkhar (32), Eborlang Nongtdu (35), Emerson Dkhar (25), Roilang Dkhar (36), Henry Shangpung (32), Thynda Lyngdoh (36), Kletin Suchiang (27) bad November Dkhar (24).
