Shillong, Risaw 05 : Ka Khasi Students’ Union (KSU) kala kynnoh ia ka Tnad Pulit ba ka pyniaid iaki kam dawa pisa ha ka surok National Highway ha Mawkhanu bad Diengpasoh, bad kynnoh ba ki Pulit kila khrong jubor haduh T.200 haduh T.5000 na kawei pa kawei ka trok kaba kit mar kynthup ki marbam.
Ha ka ujor sha u Myntri Rangbah Conrad K Sangma, ka KSU kala dawa ban weng noh mardor ia u Superintendent of Police ka East Khasi Hills Bah Vivek Syiem bad ban thung ia ka jingtohkit da ka kynhun ba laitluid.
Ka seng ka ong ba u Education Secretary samla Alerick Kharjana ula ialam ia ka jingkhynra ba sopsop ha ka 30 tarik Nailur ha ka por 3 baje janmiet bad ioh ring video haduh 30-40 tylli ki trok kiba pynieng ha ka sem ba shna beain ki Pulit tang hapoh ka shi kynta ban siew pisa.
“Ka Seng tang hapoh ka shikynta kala lum ia ki sakhi video ba kumba 30-40 tylli ki trok kila ieng ha kine ki arjaka harud jong ki sem beain, ha kaba ki nongbud trok lane ki nongniah ki hap hiar na kali bad iaid sha kine ki sem bad siew ia ka pisa ba T.200-T.500” ong ka KSU ha ka shithi ba 5 tarik Risaw.
Kala kam ba ki nongniah trok kila phla ha ki nongialam ka KSU baki hap ban siew beit ia ka pisa lem kumta kin mad ia ka jingshah pyndik ne shah shoh.
Kat kum ka jingong ka KSU, da ka jingiaid haduh 500-800 tylli ki trok ha ka shisngi, ka jinglum pisa beain ka lah ban kot sha ka T.1 lak haduh T.2 lak ha ka shisngi, kaba la pynbor ia ka jingkiew dor ki mar ki mata ba thied u paidbah.
Ka KSU ka kynnoh ba haba ki dkhot ka seng ki leit kylli tohkit, ki Pulit ha Mawkhanu kila pher ha ryngkat ka pla ba thep pisa katba kito kiba don ha Thangshalai kila buhrieh ia ka pisa. Kine ki pulit kila kynnoh ba kila leh ia kane ka kam halor ka jingbthah jong u Officer Incharge ka Mawryngkneng Police Station bad ka In-Charge ka Diengpasoh Outpost.
“Kane ka jingkhynra ka kyrpang…ka pyni shai ia ka rukom treikam kaba jur ka bamsap ha ka Jylla khatam ha East Khasi Hills kaba hap hapoh ka jingkhmih jong u SP Vivek Syiem” kynnoh ka KSU.
Ka KSU kala kdew ia ka video ba saphriang paidbah ha ka 18 tarik Jylliew, 2026, kaba pyni ia kum kijuh ki jingkhrong pisa beain, hynrei ka ong ba ym shym la leh eiei halor kane.
“Kumta, u SP Vivek Syiem bad ki bor district kim lah ban kam ba kim don jingtip ia kum kine ki kam beain lada…kim tip…ka mut ba um pat biang bad um pat iahap ban long u SP….bad lada u tip bad u jied ban nym leh eiei, kane ka pni ba u don bynta lang ha kane ka jingkhrong pisa beain” ong ka shithi.
Ka KSU kala kynnoh ruh ba hadien ka 30 tarik Nailur, ki Pulit kila leit pynpra ia kine ki sem ba shipor halor ka jingbthah u SP ban pynjulor ia ki sakhi, katba tang ki constable kila shah sospon bad u OC ula shah pynkynriah kam/
“Ha ka jaka ban kem ia ki Pulit ba bamsap, u jied ban leh eiei da ka lynti kaba jem tang ban iada ialade bad pynthame ia ki paodbah….tang ban pynlong ia ki Pulit constable kum ki langknia” kala ong.
Kala kam ruh ba ka sem ha Thangshalai kam don satia ia ka NOC na ka Dorbar Shnong, kaba la pyn thikna ruh da u Secretary Youstar Kharumnuid ha ka 3 tarik Risaw ha kawei ka kot khubor Khasi.
Haba pyndonkam ia ka nongrim jong ki Pulit haba kem ia u President, Vice President bad General Secretary hadien ka rally thuk thuk ba 19 tarik Nailar, ka KSU ka ong “ Ki nongialam kim lah ban pynjngai ialade na kaei kaba jia hapoh ka lama jong ka seng…..kumta,haba pynshong nongrim ia ka nongrim ki Pulit….u SP Vivek Syiem ruh u dei ban shah kem bad shah pynshitom, namar um lah ban pynjngai ialade na kaei kaba jia hapoh ka Tnad Pulit kaba hap ha ka jingkhmih jong u”.
Ka KSU kala kyntu ia u Myntri Rangbah ban weng noh ia u SP bad ia u Deputy Commissioner ka East Khasi Hills, hukum ban pynlong ia ka jingtohkit da ka Tnad bad thung ia ka jingtohkit da ka kynhun kaba laitluid.
“U nongtuh um lah ban tohkit ia u nongtuh” ong ka KSU haba kynthait ban ujor ia ka ejahar ha Police Station bad kyntu ia ka Sorkar ba kan shim ia kane ka shithi kum ka jingujor ka seng.
