Nongpoh, Risaw 05: Ka Hynñiewtrep National Youth Front, HNYF Nongpoh Circle, ha ka sngi Nyngkong, ka la leit ia kynduh ia u Deputy Commisioner ka Ribhoi Dr. Abhishek Saini ban pynsngew halor ki jingeh jong ki khynnah skul kiba ïaid lyngba ka National Highway-6 haka shnong Pahamrioh.
Ia kane ka jingiakynduh la ialam da u Samla Birbor Khongbeh u General secretary ka HNYF Nongpoh Circle, Samla Ronald Tangsang, Finance secretary U bah Stephan Kshiar Adviser Bad u Samla Kitbok Khongdup.
Haba kren sha ki lad pathai khubor u Samla Birbor u la iathuh ba ka jinglong jingman jong ka surokbah haka shnong Pahamrioh ka buh jingma shi katdei ïaki paidbah khamtam eh ïaki khynnah skul namar ba kam don ka jaka ïaid kjat kaba shngaiñ naka bynta jong ki.
U la iathuh ruh, haba ki khynnah skul ki ïaid lynti ban leit sha skul ne ha kapor wai skul, ki khynnah kin hap ban shu mareh pynsted tang ban lait na katei ka surokbah namar ba kam don kano kano ka jingshngaiñ naka bynta jong ki bad ba ki kali ha kitei ki bynta ki ju pynher sted.
Ka HNYF ka kyntu ia u Deputy Commisioner ban bthah iaka NHAI ba kin tap noh daka slap ïa ki nala kiba don ha kitei ki bynta khnang ba ki khynnah kin ioh ban pyndonkam ïaka nala kum ka footpath lane ka lynti ïaid kjat.
U samla Birbor u la lathuh ba ha kane ka jingiakynduh, U Deputy Commisioner ka Ribhoi u la kular ban shimkhia ia kane ka kam. Ha kajuh kapor ka HNYF ka kyntu ba ia kane ka kam dei ban shimkhia mardor khnang ba kan long ka jingshngaiñ naka bynta ka leit ka wan jong ki khynnah skul.
