Shillong, Risaw 05 : Ka jingiap I khynnah 3 snem na Domkynroh katba dang pynkit sha ki hospital ban ioh jingsumar, kala pynbor ia ki bor District ka West Khasi Hills ban pan ia ka kaiphod kaba bniah na ka tnad ka Koit ka Khiah, ka Block bad ka PWD (Roads).
Ka bor district kala ong ba ia ka kaiphod la pan na u Block Development Officer, Rambrai, u Exe-cutive Engineer, PWD (Roads), bad District Medical and Health Officer, West Khasi Hills, ban lah pynman ia kiei kiei baroh kiba jia.
Kat kum ka jingtip ba dang shu ioh, ine I Khynnah ila pang jur kynsan ha Domkynroh kaba hap hapoh ka Mawkhiat Sub-Centre- ka jaka sumar PM-ABHIM kaba la treikam la shisnem eiei bad kaba jngai kumba shikynta shiteng da ka kjat na ka shnong kaba hap hapoh ka Rambrai PHC.
Ki bor district ki iathuh ba ka kali kit nongpang ba kyrkieh jong ka Chief Minister’s Safe Motherhood Scheme (CMSMS) kala don ha ka thain hynrei ym shym la lah ban pyndonkam ia ka.
“Ka jingtip ka pynpaw ba ki health workers ka thain kim shym la ioh jingtip halor ka jingpang jong ine I khynnah hashuwa lane ha ka por ba paw dak ka jingpang, bad kumta ka ym shym la lah ban pyndonkam ia ka kali kit nongpang ha ka por kaba dei” kala ong.
Kala pynpaw ruh ia ka jinglong kyndong jong ka Domkynroh, kaba ki kali ki hap ban iaid lyngba ka shnong Mainop bad ka surok ka bym lah ban iaid kali ha ka por jur slap nalor ka jingduna ki kali kamai paidbah.
Ban leh eiei halor ki lad pyniasoh, ki bor district kila pyntip ba ia ka project surok ba 10 Km- ka surok ba 4 Km jong ka surok PMGSY Rambrai-Mawrok sha Nonglang kaba iaid lyngba ka Domkynroh, Phase-I- lah dep ban mang pisa hapoh ka Central Road and Infrastructure Fund (CRIF).
“Kane ka surok ba tyrwa kan ai ia ka lad pyniasoh beit beit sha Domkynroh bad kan pynpoi sha ka thain Mawdet bad ki shnong kiba don marjan…..ka ban lah iaid ki kali ha baroh saw aiom bad ban pynioh ruh ia ki jingshakri ha ka koit ka khiah bad ki jingjia ba kyrkieh” kala pynpaw.
Kum ka sienjam bam ardor, ka hukum multi-disciplinary jong ka Tnad ka Koit ka Khiah kan leit ban jurip ha Domkynroh ha ka 6 tarik Risaw, kaban pynbud daki jingleit ba bun sien ban peit ia ka jingdonkam ha ka liang ka koit kakhiah bad ki jingeh haba don ki jingjia ba long kyrkieh.
“Ki jingshen kin pyni lynti ia ki bor district ba kin shim ia ki sienjam bam ardor ha kaban pynkhlain ia ki lad ban ioh jingsumar bad ki jinglah ban leh eiei haba don kino kino ki jingjia ba kyrkieh ha ka thain” kala ong haba bynrap ba yn sa bthah ia ka tnad PWD (Roads) ba kan pyntrei kloi ia ka surok CRIF.
