Shillong, Lber 10: U Myntri ka tnat Public Health Engineering (PHE) Marcuise N Marak hynne ka sngi thohdieng, ula ong ba shen un sa lum iaki ophisar ka tnat PHE ban buddien iaka jinglong jingman ki projek kiba la donkam ban pyndep noh hapoh kine ki snem ban wan.
Haba kren sha ki lad pathai khubor u Marcuise ula ong ba ka sorkar pdeng kan sa pyllait pisa ha ka ban pynthikna ba baroh ki tyllong iïng kin ioh um bam um dih bad kum u Myntri un pynthikna ba ki paidbah kin ioh nong na kane ka jingiarap pisa ka sorkar pdeng.
“La donkam ban pyntrei hok ia baroh ki skhim kiba ka sorkar pdeng ne ka sorkar jylla ka mang naka bynta ban sam um bam sha ki paidbah khnang ba ha ki 30 snem ban wan, ki paidbah kin ioh um bam ha man ki tyllong ïng” la ong u Marcuise.
U Marcuise ula ong ba kum u Myntri un iai buddien bad un leit jurip ruh ia baroh ki projek ki bym pat dep ban pyntrei khang ban pynthikna ba ki kam ki iaid beit iaid ryntih noh nangne shakhmat.
“Haduh mynta ngam pat ioh jingkhein haba iadei bad ka jingpyntrei iaka skhim Jaal Jeevan Mission (JJM) ha Meghalaya hynrei nga kyrmen ba ki ophisar bad ki contractor kiba don bynta ban pyntrei ia kane ka skhim kin leh hok iala ki kamram naka bynta ka jingmyntoi u paidbah bad ka jylla baroh kawei” ula ong.
U Myntri ula pynpaw ruh ia ka jingdonkam ka jingiatreilang jong baroh ban shim ka jingkitkhlieh ha ka ban pynthikna ba ki projek bad ki skhim kiba dei ban pyntrei kin iaid beit iaid ryntih.
