Imphal, Lber 10 : Ka jingkhot pynlong ia ka jingiaid rally ba jai jai (peace rally) da ka Seng Kuki Students Organisation-GHQ nalor kiwei pat ki kynhun seng jong ki trai shnong ha Kangpokpi district ka Manipur ka la kylla pynmih pynban ia ka jingiakynad hadien ba ki paidbah bad ki pulit ki la poi sha ka jingialeh markylliang.
Kane ka la wan long hadien ba ki nongkhot pynlong rally ki la kyrpad ia ki paidbah kiba wan iashim bynta ba kin kiar na kino kino ki jingpynmih jingiakynad.
“Katkum ka jingpyntip bad ka jingkyrpad ba la buh da ka seng KSO-GHQ ha ka 9 tarik mynta u bnai la kyntu ia ki paidbah jong ka Kangpokpi District ba ka KSO-SH kan pynlong ia ka jingiaid rally kaba jai jai.Ia kane ka iakhih ba jai jai la pynbna wat hadien ba na kal iang u Deputy Commissioner u la pynjari da ka kyndon Crpc 144 kaba long pyrshah ia ki riti synshar khadar jong ka ri katkum ka Article 19, ban khanglad ia ki jingiaid rally kiba jai jai.Kano kano ka jingpyndonkam bakla ia ka por lah ban rah ia kane sha ka iingbishar namar ym don ba long halor ia ka ain,” ong katei ka seng.
“Ngi kyrpad ia ki paidbah jong ka Kangpokpi District ban iatylli lang kawei bad ban pyndonkam iala ki jong ki hok ban pynlong ia ki jingialang kiba jai jai.U Blei un don ryngkat bad ngi,” ong shuh shuh katei ka kynhun.
Ki katto katne ki video kiba la saphriang la iohi ia ka jingialeh markylliang hapdeng ki bor pulit bad ki paidbah kiba rah ryngkat ki ding ha Kangpokpi.
Lah ban kdew ba shi sngi hadien ka jingthmu ban pynlong ia kane ka rally, la pynjari mardor ia ka kyndon Crpc 144 da ki District Magistrate ka Tengnoupal u Ranjan Yumnam, IAS u Sharath Chandra Arroju IAS jong ka Churachandpur Sharath Chandra Arroju, kumjuh na ka bynta ka Kangpokpi.
Ha ka 23 tarik u Kyllalyngkot ba la dep, ka Joint Coordination Committee on Tribal Rights, Manipur (JCCOTR-M) ka la ong ba ka jingwan khynra ba dang shen pyrshah ia ki briew kiba shah kynnoh shong beain ha ki jaka khlaw sorkar khamtam ha Kangchup Chiru kaba hapoh Kangchup Geljang sub-division bad ha ka shnong K Songjang kaba ha Henglep sub-division ka la pynkylla khlem iing khlem sem ia ki spah ngut ki nongshong shnong.
