Shillong, Lber 10: Ki pulit ka Lumdiengjri Police Station bad ka kynhun Anti Narcotics Task Force (ANTF) ka East Khasi Hills, hynnin ka sngi Palei, kila ioh kem ia ki 5 ngut ki nongdie drok kynthup kawei ka Longkmie ba dang rit khun, naka thaiñ Mawprem bad la ioh ruh ban kurup bun bah u Drug na ki.
Ia kine ki nongkhaii droks la ioh kem ha artylli ki jingkhynra bala pynlong hynnin ka sngi.
Ha ka por mynsngi, ki Pulit kila iohkem shwa ia uwei u nongdie drok najan ka ophis jong ka Khasi Hills Autonomous District Council bad na ka met jong une u nongdie drok kila ioh kurup ia u drug Heroin uba la thep hapoh ki 5 tylli ki synduk uba don 66.46 Gram.
Ki pulit kila kurup ruh ia 2 tylli ki Mobile Phone bad ia ka kali kaba la pyndonkam da une u nongdie drug.
Ha ka por mynmiet hadien ka jingioh ia ki jingtip kiba paka, kila leit ban khynra sa ia kawei ka ïing ha ka shnong Lumsohphoh, Lower Mawprem bad kila ioh kem ia 4 ngut ba kynthup ia 2 ngut ki shynrang bad ar ngut ki kynthei.
Na kane ka iing, ki Pulit ki la ioh kurup ia u drug Heroin uba don 268.71 Gram, ka pisa T.6,87,150, 7 tylli ki Mobile Phone, 60 tylli ki Injekshon bad ki synduk thep drug kiba thylli.
Ki pulit kila pynngat ia kitei baroh hapoh ki kyndon aiñ halor ka jingdonkti ban dei be-aiñ ia u drug bad ka jingtohkit ka dang iaid shakhmat.
Na ka liang u DGP ula ong, ba kawei na ki kynthei kaba shah kem na Lower Mawprem kadei kaba dang ai buin khun bad ula pynpaw ruh iaka jingsngewkhia halor ka jingjur jong ka jingkhaii drug be-aiñ.
