-->

Lah kut ka jinghap ieng lain ha ki Ophis DTO | Haduh 42 ki Transport Services lah leh online

Date:

Share post:

Shillong, Naiwieng 19 : Kiba kwah ban pynthymmai iaki licence, pynkylla ia ka hok longtrai ia ki kali, lane siew ia ka traffic challan ha Jylla, kim donkam shuh ban hap leit sha ki Ophis jong ki District Transport Officer, namar mynta haduh 42 tylli ki Transport Services (ki jingshakri ha ka kam kali) la lah ban shu leh online.

U Myntri Rangbah Conrad K Sangma ha ka sngi Palei, ula pyllait paidbah ia ka thup jong ki jingshakri da ki kor digital kaba buh ia 42 tylli ki jingshakri kam kali (transport services) ban shu leh online, wanrah ia ka e-Challan ha baroh kawei ka Jylla, plie ia ka online portal na ka bynta ki subsidy jong ki kali elektrik, bad wanrah ia ka SaveLIFE Foundation ban iarap pynduna ia ka jingiap ha ki surok.

Ka bynta kaba kongsan jong kane ka long ka Digital Transport Citizen Services bad e-Challan System, kaba la shna ha ka platform VAHAN bad SARATHI jong ka Sorkar India.

Na ki 42 tylli ki jingshakri kiba la pynlong digital, 30 tylli ki dei ki jingshakri kiba ïadei bad ki kali hapoh ka VAHAN, katba 12 tylli ki dei ki kam kiba ïadei bad ka Driving Licence hapoh ka SARATHI. Haduh 26 tylli ki dei ki jingshakri kiba thymmai kiba lah ban leh online, katba 16 tylli ki jingshakri kiba la don lypa la pynrung lang hapoh kawei ka rukom treikam digital.

Kane ka mut ba ki paidbah mynta ki lah ban aplai online na ka bynta ka jingpynkylla trai kali, NOC, ka jingpynthymmai ïa ka RC, ki Certificate Fitness, jingsiew ïa ka vehicle tax, ki permit, Learner’s Licence, ka jingai bad pynthymmai ïa ka Driving Licence, ka duplicate licence bad ka International Driving Permit — bad ki lah ruh ban buddien ïa ki application haduh ban ïoh ïa ki.

“Ka Digital Transport Citizen Services bad e-Challan System kan pynlong ïa ki jingshakri kiba ïadei bad ka transport kiba kham suk ban ïoh, kiba kham treikam bha bad kiba kham pynsuk ïa ki paidbah, ha kajuh ka por kin wanrah ïa ka jingtreikam kaba shai bad ba don ka jingkitkhlieh,” ong u Conrad.

Ki paidbah ki lah ban ioh ïa kine ki jingshakri lyngba ka website jong ka Department of Transport and Civil Aviation, ki portal VAHAN bad SARATHI, ka mParivahan app, bad lyngba ki Common Service Centres kiba don ha kylleng ka jylla.

Ka jingpyntreikam ïa ki aiñ ruh mynta la pynlong digital. Ka tnad ka la buh ruh ia 50 tylli ki Point-of-Sale (POS) device ha ki District Transport Officer (DTO) bad Motor Vehicle Inspectors (MVI) ba kin ai ïa ki e-Challan ha ka por ba donkam bad ban siew ïa ki kuna khlem da pyndonkam pisa. Ki paidbah ki lah ban peit bad siew ïa ki challan online, bad ban ujor ïa ki jingeh lyngba ka online grievance redressal system.

Ha kajuh ka por, u Myntri Rangbah u la plie ïa ka Online Application Portal for EV Subsidies hapoh ka Meghalaya Electric Vehicle Policy 2026.

“Ka Online Application Portal na ka bynta ka EV Subsidies kan pynlah ïa ki paidbah ban aplai ïa ka subsidy jong ki kali elektric da kaba leh online ha ka rukom kaba suk, kaba pynsuk ïa ka jingpynïaid ïa ki application bad kaban pynshlur ïa ka jingpyndonkam kham bun ïa ki kali elektric,” u la ong.

Ki nongthied kali electric kin ïoh ïa ka jingïarap pisa kaba T.25,000, ryngkat bad ka jingpyllait na ka jingsiew ïa ka vehicle registration fee.

“Da ka jingïarap pisa kaba T.25,000 ïa ki nongthied EV bad ka jingpyllait na ka jingsiew ia ka vehicle registration fee, ngi pyrshang ban pynlong ïa Meghalaya kaba kham khuid, kham jyrngam bad ka Jylla kaba lah ban neh,” ong u Donrad.

Ka jingpynbna kaba lai ka dei ka jingïateh soskular (MoU) bad ka SaveLIFE Foundation ban pynkhlaiñ ïa ka jingshngaiñ ha ki surok lyngba ka jingpynsngewthuh paidbah, ka jingpynkhlaiñ ïa ki bor treikam, ka jingpyntreikam ïa ki sienjam kiba pynshong nongrim ha ki sakhi bad ki jingtip kiba thikna.

“Ka thong jong ngi ka long ban pynduna ïa ki accident kali ha surok, ban iada ia ki jingim ki briew bad ban pynsngewthuh ia ki paidbah ba kin pyndonkam ia ka surok da ka jingkitkhlieh ha kylleng ka Meghalaya,” ong u Conrad.

Share post:

-->
spot_img

Popular

More like this
Related

“Khlem leh politics, hynrei dawa iala ka hok” : Synniang ki nonghikai deficit mar T.1 sha u DyCM

Rai ban pynbteng beit ia ka jingsangeh treikam Shillong, Naiwieng...

Yn siew ka sorkar ia ka arrear DA | Ka CPF ka dang don ha Iingkashari: ong u DyCM ia ki nonghikai deficit

Shillong, Naiwieng 19: U Symbud Myntri Rangbah ka Jylla...

Meghalaya govt will clear DA arrears, CPF matter is before court: Prestone tells deficit teachers

SHILLONG, NOV 19: Deputy Chief Minister Prestone Tynsong on...

Cherry Blossom | Wan poi u Nelly ha Shillong; pynkhreh ka Jylla ia ka miet hip-hop

Shillong, November 18: Ka Shillong kala pynkhreh ban pynlong...