Ap ka Ri Bhoi United FC iano yn iakhun Final
Nongstoin, Lber 9: Ka United SC Kolkata ka la pynkhreh bha ialade ban iakhun ia ka semi final 2nd leg pyrshah ia ka Lamare SC Mawlai ha ka 11 tarik ha madan New Nongstoin, ka jingialehkai kaba la iai ap khmih lynti bha da ki paidbah jong ka sor Nongstoin.
Kumban shu pynkynmaw, kine ki ar kynhun ki la iakynduh ha ka semi final 1st leg jong ka lympung phutbol ha Nongstoin. Ha kane ka jingiakhun, ka Lamare SC ka la jop da shi kol la nod.
Mynta ka kynti, ka Kolkata ka la pynkhreh ym tang ki rang ialehkai na Kolkata, hynrei da ki rang ialehkai bar ri kumba katto katne ngut, ha kaba kine ki rang ialehkai ryngkat bad ka kynhun baroh kawei ki la dep ban poi ha Nongstoin naduh ka miet sngi balang jong ka taiew. Kumjuh ruh na ka liang ka Lamare SC ka la pynkhreh da ki rang ialehkai Santosh Trophy ka Jylla.
Lah ban kdew hangne ba ha kane ka lympung phutbol ba la tip kum ka ‘Invitation Knockout Football Tournament 2022-23’ ba la pyniaid da ka New Nongstoin Sports Social and Cultural Club, kawei na ki kynhun ba khlain bor kata ka Ri Bhoi United FC na Ri Bhoi District, ka la rung lypa sha ka Final bad ap ia kawei napdeng kine ki ar kynhun ka ban sa rung final na ka bynta ban iaknieh pat ia ka nam lahduh, ha kaba ka song tyngka na ka bynta ka lahduh ka long 7 lak bad ia kaba wan ba ar ka long 3 lak tyngka.
Na ka liang u Bah G.Syiemlieh President ka NNSSCC lyngba u kyrwoh khubor, u la pyntip sha baroh ki paidbah ba ieit phutbol na kylleng ki jaka, ba kin hiar sha madan New Nongstoin ha ka sngi saitjain ban sakhi ia kane ka jingialehkai, ha kaba la pyntip ban sdang ia ka kick off kan long beit thik ha ka por 1:50 noh phai sngi.
