Shillong, Lber 09: Ka seng trei mon sngewbha ka Impulse NGO Network hynne ka sngi kala sam sngewbha haduh 42 tylli ki Mobile Phone (Smart Phone) sha ki longkmie, ki rangbah bad ki samla kiba don bynta ha ka ban seng kam lade.
Ka Impulse NGO Network ka la leh ia kane kum shi bynta ban rakhe iaka jingkynjoh 35 snem ha ka kam shakri paidbah.
Kane ka jingsam ia kine ki Mobile Phone (Smartphone) ka long ruh ka jingai jingmyntoi ia ki ba ioh jingmyntoi ban pyniaid iew ia ki tiar ki tar bad ban pynkhlaiñ ia ka ioh ka kot.
Haba kren ha kane ka sngi ka kong Hasina Kharbhih kala ong ba ka Impulse NGO Network kadei ka seng trei mon sngewbha kaba don ia ka thong ban pynduh ia ki kam khaïi briew na kawei ka jylla sha kiwei pat bad ban peit ruh halor ka jingwan buhai shnong na kiwei pat ki Ri ha South East Asia.
Ka la iathuh ba ka Impulse NGO Network ha ryngkat bad ka jingiatreilang bad ki pulit ka la lah ban tehlakam ia ki kam shah khaïi briew bad ki la ioh ban pyllait ruh ia kiba shah khaïi na kawei ka jylla sha kawei pat kynthup kiba na ka thaiñ shatei lam mihngi.
Ha kane ka sngi la ioh ruh ka jingkren naka kong Bariphylla Lyttan kaba dei ruh ka Case Manager bad kiwei kiwei de.
