Shillong, Lber 09: Ka Sorkar Meghalaya Democratic Alliance (MDA)-II kala pynkynriah kam biang ia kiba bun ki Ophisar MCS ka Jylla kiba dang shu pynkynriah kam dang shen namar ka hukum jong ka Election Commission of India (ECI) ban lah pyniaid khuid ia ka elekshon.
Napdeng kine ki Ophisar MCS, ka Sorkar kala wanrah biang ia u Bah Ronnieson Wahlang bad ia u Bah Peter T Passah sha kum ki Addl Deputy Commissioner ka East Khasi Hills.
Kat kum ka jingpynbna (notification), u bah Ronnieson Wahlang u ba bat kum u Deputy Secretary sha ka sorkar Meghalaya ula shah pynkynriah kum u Additional Deputy Commissioner ka East Khasi Hills.
U bah Peter T. Passah u bat kum u Additional Deputy Commissioner ka West Garo Hills ula shah pynkynriah kum u Additional Deputy Commissioner ka East Khasi Hills.
Kiwei pat ki Ophisar MCS ki dei u u P. Kr. Boro u badei u Additional Deputy Commissioner ka East Khasi Hills District bad u Additional Deputy Commissioner ba peit iaka Pynursla (Civil) Sub-Division Pynursla ula shah pynkynriah kum u Additional Deputy Commissioner ka West Garo Hills.
U Tangchiring K. Sangma u ba dei ruh u Addl Deputy Commissioner ka East Khasi Hills ula shah pynkynriah kum u Additional Deputy Commissioner ka West Garo Hills District.
U bah Lamphrang G.M. Kharmih u badei ruh u Addl Deputy Commissioner ka West Garo Hills ula shah pynkynriah kum u Additional Deputy Commissioner ka East Khasi Hills District.
Ka kong Dalikynti Kharshiing ka ba bat ruh kum ka Addl Deputy Commissioner ka West Khasi Hills kala shah pynkynriah kum ka Additional Deputy Commissioner jong ka East Khasi Hills District.
U Albert G. Momin u badei u Additional Deputy Commissioner ka East Khasi Hills ula shah pynkynriah kum u Additional Deputy Commissioner ka West Garo Hills.
