Shillong, Lber 04 : Ka Voice of the Peope Party (VPP) hynne ka sngi saitjain, kala pynpaw ia ka jingsngewkhia halor ka jinglong jingman ka sain pyrthei ha Jylla khamtam ha Shillong namar ka jingmih surok jong ki kynhun Sengbhalang ban pyrshah ia ka jingthmu thaw Sorkar ka NPP.
“Ka VPP ka kyrpad ia ki paidbah haba pyntreikam ia ka hok ban iakhih, ba kin pynneh ia ka jingshongsuk shongsain hapoh ka Jylla” ong u nongaiktien ka VPP Dr B Myrboh ha ka kyrwoh bala pynmih hynne ka sngi.
Kane ka jingiakhih kala mih hadien ba ka NPP ba ialam da u Conrad K Sangma, kala kam ban thaw ia ka Sorkar hynnin ka sngi thohdieng. U Lat ka Jylla Phagu Chauhan ula khot nyngkong ia ka NPP ban thaw ia ka Sorkar namar ka dei ka party kaba don bun eh ki MLA kaba kot haduh 26 ngut.
U Conrad ula dep ban aiti ia ka thup kyrteng jong ki 32 ngut ki MLA sha u Lat ka Jylla ban pynskhem ia ka jingkam ha kaban thaw ia ka Sorkar thymmai. Kine ki MLA ki kynthup 26 NPP, 2 BJP, 2 HSPDP bad 2 ngut ki MLA Independent. Hynrei ka HSPDP kala kam ba ka party ka khlem aibor ia ki MLA ba kin leit kyrshan ia ka NPP.
Ha kawei ka liang, ka UDP kala pyrshang ban thaw ia ka Sorkar ba kan ialam hi ha kaba u Myntri Rangbah un dei u Khasi bad kala iakren ruh ia kiwei ki seng sain pyrthei kynthup ia ka VPP, HSPDP, Congress, TMC.
Ka UDP ka don 11 ngut ki MLA, VPP-4, Congress bad ka TMC ki don mar 5, PDF-2, HSPDP-2, kaba long baroh 29 ngut. HYnrei, da ka jingiaid pyrshah jong ki 2 ngut ki MLA ka HSPDP ia ka party, kala pyn pulom ia ka jingthmu jong ka UDP, kaba la pynlong ia ka kynhun synrop ba khlem iakhleh NPP bad BJP ban don satang 27 ngut ki MLA.
Ha kajuh ka por, ka VPP kala ong ba ka kamai ka kajih jong ki paidbah kam dei ban shah ktah bad khamtam eh ba ym dei ban pynthohbria ia ka Jaidbynriew Khasi da ki jingiakhih jong ki sengbhalang kiba kyntur ban thaw ia ka Sorkar ba ialam da ka Seng Riewlum bad ban ioh ia u Myntri Rangbah da u Khasi.
