SHILLONG, MAR 2: Ka jinghuri hura kala mih kynsan hynne ka sngi, hadien ba pyndep iaka jingniew vote ha ka jylla, namar ka jingbym hun jong ki paidbah iaka jingpynbna iaka resol ha ki 3 tylli ki constituency kiba kynthup iaka Mariang, Shella bad Mokaiaw.
Kila don katto katne tylli ki kali kiba la pynieng ha phyllaw jong ka DC Office, Mairang, Eastern West Khasi Hills District kila shah wiangding ha ki paidbhur.
Katei ka jingjia, kala jia hadien ba ki nongkyrshan ka seng Congress kila leit ban kerkut iaka ophis jong u DC ha kaba kila pynpaw iaka jingbym hun iaka jingpynbna iaka resol jong ka elekshon.
U President ka UDP Bah Metbah Lyngdoh ula shah pynbna kum u nongjop iaka elekshon daka jingioh 19066 vote bad ula pynrem ia u kyrtong ka Congress u Bah Batskhem Ryntathiang uba la ioh 18911 vote.
Ki pulit kila hap siat da ki tyndong lyer pynsat khmat ban pyntieng ia u paidbah ba kin phet na kane ka jaka.
La ong ruh ba kine ki nongkyrshan kila wiang ding ruh ia ka phyllaw u DC.
Ka khubor ba ioh ka iathuh ba lah don ruh ka jingiap briew ha kane ka jingjia hynrei ym pat lah satia ban pynthikna.
Kam pat don satia ka jingpyntip la ki bor District kila pynjari curfew ne kyndon 144CRPC kat haduh ba thoh ia ka khubor.
Ha kawei pat ka jingjia ha Sohra, ki paidbah kila leit ban kawang maw iaka ophis jongu SDO Sohra hadien ba kila dap da ka jingbynniaw ha kaba iadei bad ka jingmih jong ka resol elekshon.
Ki khubor kiba la iohlum kila iathuh, ba la pyndonkam da kaba kynshait da ka um ia ki paidbah ba kin ia pra na katei ka jaka bad ka jinglong jingman mynta ka la long kaba biang bad la dep ban pynjur shuh shuh ia ki bor pahara.
Ha kawei pat ka liang, ki bor pyniaid jong ka West Jaintia Hills kila pynjari mardor da ka Korphiw ha ka shnong Sahsniang.
La pynmih ia katei ka hukum hadien ba kala mih ka jinghuri hura ha katei ka shnong hadien bala dep ka jingniew vote.
Katei ka hukum kala pynpaw ruh ba ka don ka jingsuba jur ba katei ka jinghuri hura ka lah ban pur bad kan nang jur shuh shuh lada ym shimkhia noh mardor bad ka lah ban poi ruh sha ka jingjot jingpra iaki jingdon jingem ne ban duh iaka jingim briew.
“Nga dap da ka jingsngewhun mynsiem ba iaka korphiw dei ban pynjari ha kitei ki jaka ban pynthikna ba ka jinghuri hutra kan sangeh shi syndon bad ban pynneh biang ia ka shongsuk shongshngain ha ka thain” ong u DC haka hukum.
