Shillong, Lber 02: U kyrtong ka Voice of the People’s Party (VPP) bah Brightstarwell Marbaniang ula thaw Histori ha rilum Khasi hadien ba ula jop ia kane ka ilekshon MLA 2023 na Mawlai konstitwensi daka ba ioh haduh 24262 Votes.
Kane ka jingjop u bah Brightstarwell Marbaniang kala pynlyngoh namar ym don ba poi pyrkhat ba u MLA barim ka Mawlai u bah Process T Sawkmie bad u MDC ka Mawlai u bah Teiborlang Pathaw, kin shah rem bad shah tam kput.
U bah Brightstarwell Marbaniang ula ioh ka jingjop daka ba pynliem noh ia u kyrtong ka NPP u bah Teibor Pathaw da ka jingtam Vote haduh 15648 Vote.
Ha ka resol ilekshon ba la pynbna mynne ka sngi, u bah Brightstarwell u la ioh haduh 24262 vote, u bah Teiborlang Pathaw ka NPP u ioh 8614, u bah PT Sawkmie ka UDP u ioh 5142, u bah Marbud Dkhar ka Congress u ioh 1506, u bah Stepbournekupar Ryndem ka AITC u ioh 255, u bah Wandonbok Jyrwa ka BJP u ioh 450.
Haba kren sha ki lad pathai khubor, u bah Bright u la ong ba kane ka jingjop ka la pynlyngngoh ia kiba bun ki paidbah khamtam ia kiba nabar jong ka konstiwensi hynrei u la khmih lynti ba un ioh ia ka jingjop namar ba u la trei shitom ha kine ki shi snem.
“Kane ka jingjop ka pyni ba ki paidbah ka Mawlai ki kwah ia ka jingkylla khamtam haba iadei bad ka pule puthi nalor kiwei de ki ishu jong ki paidbah ka Mawlai bad ka jylla baroh kawei,” ong u bah Bright.
U bah Bright u la ong ba ma u lem bad ki nongialam jong u kin trei na bynta ban wanrah ia ka jingkylla ha ka synshar ka khaddar wat lada ki don ha ka sorkar ne ha ka liang pyrshah ruh.
