Shillong, Rymphang 21 : U National President ka National People’s Party (NPP) bad Myntri Rangbah ka Jylla Conrad K Sangma, hynne ka sngi ba-ar ula ong ba baroh ki ‘Heh Nongialam’ jong ki seng sain pyrthei bapher bapher kynthup ka BJP, kiba wan ialap elekshon ha Jylla, kin sa shu jah rngai hadien ka elekshon MLA ban long la 27tarik Rymphang hynrei ka NPP “kan iai don ha syndah bad u paidbah ka Jylla Meghalaya”.
“Ki Nongialam jong ki seng sain pyrthei bapher bapher kila iaid ialap elekshon mynta ha Jylla bad kila kular ia ka bneng ka khyndew. Hynrei kim sngewthuh ia kaei kaba long ba man ha Meghalaya bad tang namar ka nam ialap elekshon, kila shu pynmih ia ki jingkynnoh ba laiphew jait” ong u Conrad.
“Mar syn kut ka elekshon, baroh kin sa shu jah rngai bad tang ka NPP ka ban iai don ryngkat bad u paidbah ka Meghalaya” ula ong na ka rynsan ialap elekshon ha Garobadha, ban pan jingkyrshan ia u kyrtong Subir Marak, uba mih iakhun pyrshah ia u Nongialam ka TMC Zenith Sangma na Rangsakona constituency.
U Conrad ula ong ba ki paidbah ka Jylla kim don lynti da kumwei pat ban jied bad ka la dei ban por ban ai ka jingshaniah ha ka party (NPP) ka ban iai don ryngkat beit bad u paidbah ka Jylla.
U Conrad ula pyni ruh ia ki khubor (message) naka Whatsapp sha ki paidbah, ba batai ba ka jingmut ba pura jong ka TMC ha ka ktien Garo ka dei ka seng sain pyrthei ba ‘shukor’ bad ka BJP ka dei ka seng sain pyrthei ba “pynkha ia ki jingkulmar” katba ka NPP ka dei ka party ba wanrah ia ki kam pynroi.
“Ki paidbah ka Meghalaya kila ai ka jingshaniah ha ka NPP. Ki paidbah kila ioh ba ka party jong ngi ka ieng beit na ka bynta ka bha ka miat u paidbah. Ngi la buh ia ka thong ban pyntyngshain ia ka Meghalaya bad ngin trei kum ka kynhun ban pynlong ia ka Meghalaya kaba khlain” ula kular.
Haba pynpaw ba ka Sorkar kala pynthikna ia ka jingshongsuk bad jinglong jai jai hapoh ka Jylla, ula ong “Ka rai jong u paidbah sha ka NPP ha kane ka elekshon kan pynthikna ia ka jingiai bteng jong ka jingwan ki kam pynroi ban kyntiew ia ka Jylla”.
U Kyrtong ka NPP na Rangsakona Subir Marak ula pan ia ka jingkyrshan na ki paidbah ba kin jied ia u kum u MLA. Ula ong ba lada ki paidbah ki ai ka rai ban pynjop ia u, un aiti ialade sha ka roi ka par jong ka Rangsakona. Ha kane ka jingialang, ula kyrpad ruh ia u Nongialam ba hakhlieh duh ka NPP ban seng ia ka College Sorkar ha Garobadha ban kyntiew ia ka pule ka dangle ha ka thain.
U Subir ula kular ruh ba lada u shah jied, un pyndonkam ia ka tulop MLA sha ka pule ka dangle jong ki Khynnah hapoh ka Constituency.
Ha kane ka jingialang, ki nongkyrshan ka NPP kila pynlong ruh ia ka Bike Rally.
