Shillong, Rymphang 21: U Symbud Myntri Rangbah ka jylla u Bah Prestone Tyngsong ula pynpaw iaka jingsngewsih bad phah iaka jingsngewlem halor ka jingkhlad kynsan jong u Myntri Kam Pohiing ka jylla u Bah HDR Lyngdoh hynnin ka sngi.
“Da ka mynsiem kaba sngewkhia nga kwah ban phah iaka jingsngewlem sha ki bahaiing bahasem jong u Bah HDR Lyngdoh uba la khlad noh hynnin ka janmiet. Na ka seng NPP ngi phah iaka khubor sngewlem sha ki bahaiing bad ia ki paidbah jong ka Sohiong constituency”, ong u Bah Prestone Tynsong.
U la ong, ki paidbah ki ju khot ieid ia u Bah HDR Lyngdoh da u maheh bad ha ki snem kiba la leit ula don bynta ha ka sorkar kaba la dep bad mynta ula pynkhreh biang ban iakhun iaka elekshon na Sohiong Constituency. La shim ruh ia u Bah HDR kum u kyrtong uba khlain hynrei ka jingkhlad noh ka jong u kala pynkyndit thred ia baroh kiba don bynta ha ka kam sain pyrthei.
U Bah HDR Lyngdoh ula jop nyngkong eh ia ka elekshon MLA ha u snem 1988 na ka Hill State People’s Democratic Party (HSPDP) bad iai bteng haduh u 1998. Ha ka Elekshon 1998, ula shah rem ha u Bah RA Lyngdoh jong ka United Democratic Party (UDP).
Hadien kane ka jingshah rem, u Bah HDR Lyngdoh ula iakhun ia ka elekshon MDC ha u snem 1999 na ka Indian National Congress bad ula ioh ia ka jingjop.
Ha ka elekshon MLA 2003 ula wan phai biang kum u MLA ka Sohiong tad haduh u snem 2018 ba ula shah pynrem noh ha u Bah Samlin Malngiang jong ka HSPDP.
