Shillong, Jylliew 27: Ki Khlieh Nongsynshar Shnong bad ki Sengbhalang kila kyrpad ia u Myntri ka Tnad Transport Bah Dasakhiat Lamare ba un tuklar lang ha kaban pynioh ia ka jaka ha Lad Nartiang, ban pynieng ia u motdur ba shi rynieng jong u woh Kiang Nongbah, u khla wait ka Ri-lum Jaintia.
Ka Kiang Nongbah Iasiat Khnam Memorial Society (KNIKMS), ka Jaintia Students Union (JSU), ka Synjuk ki Waheh Chnong Jowai (SWCJ) bad ka Dorbar Chnong Mihmyntdu, kila leit aiti da ka dorkhas ha u Myntri ba un kren lem ia ka tnad ba kan ai jaka ha ka jingiadonlang u Myntri ka Tnad Arts & Culture Bah Sanbor Shullai.
“Ngi kyrpad ia phi ban sngewbha ban mynjur lem ha kaban ai ia ka jaka ba heh kumba 5000 sqft kaba dei jong ka Tnad Transport ha Lad Nartiang, Mihmyntdu sha ka Tnad Arts & Culture ba kan pynieng ia u motdur ba shi ryngieng jong u woh Kiang Nongbah na ka bynta ka jingmyntoi jong ki paidbah ka Ri-lum Jaintia bad ban pynitynnad ruh ia kane ka jaka” ong ka dorkhas.
Halor kane, u Myntri ula pyntip ba un sa khmih bniah ia ka jingkyrpad kine ki kynhun na Ri-lum Jaintia ban pynthikna la ka long ne em ban ai ia kane ka jaka.
“Ngan sa peit bad ngan sa iashong bha ban iakren bad ka MTC. Ia kaba lah ngin ai hynrei ia ka bym lah te, ngin hap ban pynsngewthuh ia ki” ong u Bah Dasakhiat.
“Nga hap ban iakren bad iatai bad ki Heh Ophisar ka Tnad Transport ban pynthikna ba kane ka jingai jaka kan ym ktah pat ia ki project jong ka Tnad ia kiban sa pyntrei ha ki snem ban wan” ula bynrap bad ong “Lada kam don eiei hi, ka Tnad ka long kaba kloi ban ai ia kane ka jaka n aka bynta ka bha ka miat jong ka District bad ka jingkynmaw burom ia u woh Kiang Nongbah”.
