Shillong, Jylliew 27 : Ka Mawlai SC ka la ioh ban don ha khlieh duh jong ka miej ia khein point jong ka lympung Shillong Premier League hadien ba ka la jop haduh 2 – 0 kol ia ka Langsning ha ka jingiakhun kaba itynnad bha hynne ka sngi nyngkong ha madan Third Ground Polo.
Ia ki ar kol jong ka Mawlai la ioh ban thep da u Fullmoon Mukhim ha ka minit kaba 77 bad ia ka kol kaba ar pat la ioh ban thep da u Pynbha Suting ha ka minit kaba 89 jong ka kylla miet.
Ka Mawlai mynta ka la ioh haduh 6 point bud pat sa ka Langsning bad Rangdajied kiba don mynta mar saw point.
Haba phai sha ka jingiakhun, dei ka Langsning kaba ialehkai bha tangba kam ioh pat ban thep kol. Hynrei haba phai pat sha ka Mawlai, kane ka kynhun ka ialehkai kham jai jai bad kala pynkhlaiñ ia ki rang ialehkai ba shakhmat ha ka kylla miet ban ioh thep ia kine ki kol.
Ka jingiakhun lashai ka sngi Baar kata ha ka 28tarik Jylliew kan long hapdeng ka Shillong Lajong pyrshah ia ka Nangkiew Irat ha ka por 4baje janmiet ha kajuh ka jaka.
