Ka DHS (MI) ka pynlut tang T.248 klur ban iakhun Covid, mano ba pynlut T. 800 klur tam
Shillong, Rymphang 07 : U Kyrtong ka United Democratic Party (UDP) na North Shillong Dr Aman War, ula kular ban pynphyrnai khriak ia ka constituency kum u ‘Mawlynnai’ lada u shah jied kum u Nongmihkhmat sha ka Iingdorbar Thaw Ain ka Jylla.
Une u Director ka Health Services (MI) barim bala kylla riew sain pyrthei, ula thep kyrteng hynne a sngi ba-ar ban iakhun kum u kyrtong ha ka elekshon MLA-2023 ban long la 27 tarik Rymphang. La synran ia u da I Kmie, ki bahaiing hasem, ki Nongialam ka party bad ki nongkyrshan ba da ki hajar ngut.
Haba iakren bad ki nongthoh khubor, u Dr Aman ula ong ba ka rai jong u ban mih iakhun ia kane ka elekshon ban wan ka dei halor ka jingiohi ia ka jinglong jingman hapoh ka Jylla haba phai sha ka rukom synshar khadar.
“Nga dang shu shongthait kum u Nongtrei Sorkar bad kaei kaba nga la shemphang na ka kam, nga kwah ban wanrah ha ka kam sain pyrthei ban lah pynlong ia ka Jylla kum ka jaka ba itynnad kumba la iakhun naduh kaba sdang”.
Haba khein ia ka North Shillong constituency kum u “Mawlynnai bym pat kyrshut pynjlih’ (unpolished diamond), u Dr Aman ula ong “Ngi don ia ki jaka iew ha ka constituency jong nga naduh na Iewduh haduh Khyndailad bad ngi donkam ban pynjlih ia kane bad pynphyrnai kum u Mawlynnai”.
Ula kren ruh halor kiba bun ki ishu kiba ka constituency ka donkam ba kynthup naduh ka pule ka dangle, ka koit ka khiah, ki kam bhalang ha ka imlang sahlang bad kiwei kiwei.
Halor ka jingkynnoh ka Congress ba ula iohnong bha na ka jyrsieh khlam Covid-19, u Dr Aman ula ong “La jan 30 snem nga la trei hato kam mut ba nga khlem kamai eiei, nga khlem kynshew eiei ialade na kane ka kamai jong nga”.
Haba pynpaw ba ka khlam Covid kala wan kum ka ‘erlangthari, ula ong “..Kumno ka long, kumno ka jah, ka jah kum ka lyer ba jai jai balei, namar baroh ki covid warriors naduh ki Nongialam sain pyrthei haduh kiba rit kyrdan eh kila iakhun kynthup ki shnong ki shnong. Kila iakhun tyngeh bha bad ha kato ka por shuwa ban kut ka khlam ha Jylla, nga la ong ba ngi hap ban ia im lang bad ka jingpang. Haba ki khubor ki mih ba ka jingpang kala sdang khie biang, kam shym la don shuh ka jingkhuslai bad kane ka dei kaei kaba ngi la leh, ai ka jingsngewskhem, ngi la bthah ia ki paidbah ban nang kumno ban im bad kane bad ban long kiba la pynkhreh ia kaei kaban jia hadien lada wan lynshop kino kino ki jingpang”.
Une u DHS(MI) barim ula ong ba ka jingpynlut jingsep jong ka DHS(MI) ban iakhun Covid ha katei ka pork a long kumba T. 248 klur. “Mynta ka jingpynlut ka kot T. 803 klur. Phi hap ban kylli mano kita ki briew kiba donkti bad kane ka T. 803 klur”, ula ong haba bynrap “Ka Sorkar kala buh lut ia ki jingkhein jingdiah hapoh ka Iingdorbar Thaw Ain bad bun na ki Dkhot kila buh jingkylli la ki jingkynnoh ki dei kiba shisha, laka don ka jingbym pyndonkam hok hynrei kam don satia. Nga ruh nga tip ia kane hynrei “Nga kum u DHS (MI) nga pyntip baka Directorate ka pynlut tang T. 248 klur ym T. 803 klur”.
Lah ban kdew hangne ba ka jingpynlut pisa kaba bun eh ha ka jingiakhun ia ka khlam Covid-19 ka dei ka Tnad National Health Mission (NHM) kaba dei ka Tnad ba pyntreikam ia ka National Health Mission ka Sorkar Pdeng. Kat kum ki kot ki sla, kane ka Tnad kala pynlut haduh T. 550 klur tam ban iakhun ia ka khlam Covid ha Jylla.
Halor ka jingtreikam ka Sorkar MDA, u Dr Aman War ula ong “Ka Sorkar MDA ha kine ki san snem ka dei ka Sorkar MDA hynrei mynta kala dei ka DAM government”.
Ula ong ba ka Jylla ka don shibun ngut ki briew, kiba tbit ban pyniaid ia ki kam ki jam (good administrator), ki Nongkhaii, ki Nonghikai bad kam donkam satia ban wad ia ki briew na shabar ka Jylla ban wanrah ha Jylla.
“Ngi don iala ki jong ki briew hangne. Nga leit sha Jail Raid nga lap ba don bun ki Nonghikai, nga leit sha Oakland, Nga leit sha Jaiaw, Mawkhar, Nongmali- nga la ioh shibun ki jingnang jingtip da ka jingleit sha kine ki jaka. Hato ngi donkam ban leit shabar ban kyntiew iala ka jong ka Jylla? Ngim donkam satia. Ngi donkam iala ki jong ki briew ban kyntiew ia ka Jylla ha katai ka rukom kaba itynnad hakhmat ki khmat jong ki paidbah jong baroh kawei ka Ri” ula ban jur.
Haba pynpaw ia ka jingsngewskhem ba ka UDP kan ialam ia ka Sorkar ba thymmai, u Dr Aman ula ong “Ka lyer jong ka UDP naduh mynta ka sngi kan nang khlain. Haka por ba ngi rung kila ong ba ka UDP ka dei ka party kaba rem hynrei kaei kaba ioh mynta ka long ba ka UDP ka dei ka party ban jop bad ngin jop bad ngin ialam ia ka Sorkar”.
“Da ka jingnang jingtip ba malu mala ba nga la ioh kum u Nongtrei Sorkar, nga kwah ban pynlong ia ka Sorkar ba thymmai ba kan burom ia ki Nongpyniaid ia ki kam ki jaka, ban burom ia ki Ophisar trai muluk, burom ia ki kyndon bala buh naduh ki por bala leit noh, ngi la ban nang pynjanai ia kine hynrei ngim lah ban shu pynduh noh ia baroh” ula bynrap.
Haba kylli halor ka jingiakajia pud, u Dr Aman ula ong “Lada phi iakren halor ki kam khappud mynta ba ngi la ioh Jylla, kumno ngi la ioh ia kane ka Jylla, hato dei tang ka Sorkar Assam kaba soi bad ong ba kane ka dei ka bynta jong ka Jylla, em! Ka dei kaba la mynjur da ka ain ha Parliament bad haba la mynjur, u pud u sam ula shai bha bad nga kwah ban tip bniah kiei kita ki jaka ba iakajia bad mano ba wanrah ia kane ka jingiakajia-la ka dei na ka liang ka jong ngi ne kawei pat ka liang-Ngi hap ban khmih biang ia ka”.
