Shillong, Rymphang 07 : U Nongialam ka UDP bad MLA barim ka West Shillong Bah Paul Lyngdoh hynne ka sngi ba-ar, ula pynpaw ia ka jingsngewskhem ba ka UDP kan tam ia shiteng na ka jingdon ki MLA ha Jylla bad kan dei ka nongialam ha ka Sorkar thymmai hapoh ka Jylla.
Hadien ka jingthep kyrteng kum u kyrtong, u Bah Paul ula ong ba ka jingkylli halor ka jingiatreilang ban thaw Sorkar ia mynta kam pat mih satia.
“Lada ngi kubur lane ngi khein ia ka jingiatreilang mynta, kane ka jingmut ban pynieng haduh 40 ngut tam ki kyrtong. Hato phi mut ba ngi pynieng 40 ngut ki kyrtong bad ngi ong ba ngi trei shitom tang ban jop 32 ngut tam napdeng ki 40. Namar kata, ka jingkylli ia ka jingiatreilang ha kane ka khep kam pat mih satia namar ngi la pyrshang ban jop na baroh 40 tylli ki constituency. Lada ym dei 40 ruh, la kumno kumno 31 tam” ula ong.
U Bah Paul ula kyntu ruh ia ki nongthep vote ba kin jied ia ka UDP bad ban pynjop bun ki MLA khnang ba ka jingkylli ban don ka jingiatreilang kan nym mih satia.
Haba kynthoh ia ka jingkren u Symbud Myntri Rangbah barim bad Chief Adviser ka UDP Bah Bindo Lanong ba ka UDP kan nym jop wat tang 10 seat, une u Nongialam ka UDP ula ong “Ngam don bynta bad kane ka jingkhein jong u. Ngam tip satia la u la peitbniah, la u pyndonkam da ka computer, ne pyndonkam da ka calculator. Ngan burom ia ka jingpynpaw jong u khlem da bynrap ia ka jong lade”.
Haba pynpaw ba ma u bad ki para kyrtong kila pynkhreh bha na ka bynta kane ka elekshon ban wan, u Bah Paul ula ong “Ka Meghalaya ka dei ban pynkhreh ia ka lynti iaid baar. Ngi la pyndep ia ka jubili ksiar jong ka Jylla bad mynta ka dei ka kabu ia ka Meghalaya ban ieng rasong bad pynwandur ialade lyngba ka rai jong u paidbah”.
Haba kylli halor ki ishu ba un shim na ka bynta ki paidbah ka West Shillong ba kin pynjop biang ia u, une u MLA barim ula ong “Ki kam ba hakhmat eh kiba dang sahteng ia kiba nga la pyrshang bad pynleit jingmut bha ha ka por long MLA ba 15 snem ka long ban pynkupbor ia ki samla, thaw lad ban aikam aijam. Ngi don ruh ka jingeh ba tasam bha namar ka jingjyllei u droks bad ki khynnah ba pep skul shiteng por-kine ki dei ki ishu kiba nga la buh hakhmat eh”.
Haba kynnoh ba ka jingpyndonkam ia ka bor pisa ka dei kaba lam sha ka jingshah rem ha ka elekshon 2018, u Bah Paul ula ong “Lada nga dei u Nongsam, ngam jin da la rem ha ka elekshon bala dep. Jin ba nga pyndonkam ia ka bor pisa khlem pep nga la poi sha Assembly tad haduh mynta hynrei ka ba kongsan ka long ba ki paidbah ki peit ia nga kum u nongthaw policy len u briew uba lah ban iashimbynta ha ki jingiatai nia hapoh ka Iingdorbar. Namar kata, ka jingsam pisa kam da pynkhuslai eh ia nga”.
Haba kylli halor ka jingtreikam jong u MLA Bah Mohendro Rapsang, u Bah Paul ula ong ba ki nongthep vote ka West Shillong ki dei ki nongbishar kiba biang.
Halor ki jingkynnoh ba ki seng riewlum ki dei ki bym don budlum, une u Nongialam ka UDP ula ong “Baroh ki don hok ban pynsngew iala ka jong ka jingsngew. Hynrei kaei kaba nga don ban ong ka long ha ka samoi bala dep, ka UDP kala shah kyntait bha ha ki nongthep vote bad namar kata, kila lah ban jop tang 6 na ka 60 seat. Namar kata, ka jingkylli ba don budlum ne bym don budlum kam mih satia namar ka shong ha ki nongthep vote kiba rai ba ngi dei ban don tang 6 ngut ki MLA.
Une u Nongialam barim ka KSU ula ban jur ba ka long kaba donkam ia ka Meghalaya ban don noh tang kawei ka Party kaba ialam ia ka Sorkar haba kynthoh ia ka jingtreikam jong ka Sorkar MDA ha kine ki san snem bala leit noh.
