Nongpoh, Rymphang 02 : Saw ngut ki kyrtong ka Congress kila thep kyrteng hynne ka sngi palei ban mih aireng ha ka elekshon MLA-2023 ban long la 27 tarik Rymphang haba sngewskhem ruh ba ka Congress kan ioh ia ka jingjop kput ha kane ka kynti.
Kine ki kyrtong ki dei u MLA barim ka Umsning Dr Celestine Lyngdoh (Umsning), u MDC ka Mawhati Bah Charles Marngar (Mawhati), u MLA barim ka Umroi Bah Stanlywiss Rymbai (Umroi) bad ka MDC barim ka Nongpoh Kong Rona Khymdeit (Nongpoh).
U Bah Edrian C Mylliem Khun jong u MLA barim ka Jirang Bah Lamboklang Mylliem, un thep kyrteng ha ka 3 tarik Rymphang kum u kyrtong na Jirang Constituency.
Haba iakren bad ki nongthoh khubor, u Bah Charles Marngar bad Dr Celestine Lyngdoh, kila pynpaw ia ka jingsngew skhem ba ka Congress kan leh bha ha kane ka elekshon ba mynta bad ka kyrmen ruh ban jop ha baroh 60 tylli ki constituency ka Jylla.
Kila ong ruh ba ka jingmih noh jong ki katto katne ki MLA na ka party ha ki bnai bala leit, kala pynkhuslai ia ka party hynrei ka party ha kane ka kyntu kaba mynta kala ioh pat ban sei ia ki durkhmat kiba thymmai kiba don ka jingkyrmen ban ioh ia u soh ka jingjop ha kane ka elekshon.
“Ngi ioh mynta ia ki kyrtong kiba dang thymmai bad kiba khlain bad ngi don jingkyrmen ban jop ha baroh 60 tylli ki constituency. Ka Congress kan sa ioh ia ka lakam ban synhar marwei hapoh ka Jylla” kila ong.
