Shillong, K’lyngkot 28 : Ka Kynhun ki Nongpeit pyrman ba kyrpang bala phah da ka Election Commission of India ba kynthup ia u Special General Observer Y Tripathy, Special Police Observer V Johri bad Special Expenditure Observer B Murli Kumar, kila wan iuhkjat ha Jylla ban shong bishar ia ka jingpynkhreh ka Jylla ban pynlong ia ka elekshon MLA.
Kane ka kynhun kala pynlong ia ka jingialang bishar kam kaba bniah bha bad u Chief Election Officer (CEO), ki State Police Nodal Officer ha ka jingiadonlang u Chief Secretary ka Jylla bad u DGP ka ylla. Ia kane ka jingialang la pynlong hynnin ka sngi.
Hadien kane la pynbud da ka jingialang bishar kam ba iadei bad ka Election Expenditure Monitoring jong ki Central bad State Enforcement Agency kum ka Income Tax, CGST, ED, NCB, DRI, CBIC, SLBC, RBI, Airport Director bad State Police, Excise, Forest bad ki State GST Commissioner.
Ha ka 28 tarik Kyllalyngkot, kane ka kynhun kala pynlong ruh ia ka jingialang bishar kam halor ka jingpynkhreh jong ki Deputy Commissioner, ki Superintendent of Police bad ki Nodal Officer Expenditure Management ha baroh ki 12 tylli ki District ka Jylla.
Kane ka kynhun kala ban jur ia baroh ki bor khmih elekshon jong ka Jylla bad na Delhi ba kin pynthikna ia ka madan kaba khlem lah liang sha baroh ki seng sain pyrthei bad ruh ban bthah ba kin bud ryntih ia ki kyndon ka ECI haba iadei bad ki kam jong ka Elekshon.
Kila shong bishar ruh haba iadei bad ka jinglong jingman ka suk ka sain bad ka jingphah ia ki bor pahara CAPF ban wanrah ia ka jingsngew shngain ha ka jingmut jingpyrkhat jong ki nongthep vote.
Halor ka jingpynlut pynsep, ka kynhun kala ban jur halor ka jingdonkam ban iatreilang hapdeng ki Agency bapher bapher, ban pyntreikam ia ki nombor ka FST & SST bala buh bad kiwei kiwei.
