Shillong, K’lyngkot 15 : U Myntri Rangbah ka Jylla Conrad K Sangma hynnin ka sngi saitjain, ula pynbna paidbah ia ka jingpynrung ia ki Commando Kynthei ka SF10 hapoh ka ‘Meghashakti’ jong ka Tnad Pulit ha ka jingiadonlang u Myntri kam Pohiing ka Ri ma Lahkmen Rymbui, DGP LR Bishnoi, Chief Secretary Bah DP Wahlang bad kiwei kiwei.
U Conrad ula ong ba ka dei ka sngi kaba khraw ha ka histori jong ka Tnad Meghalaya Police bad pynpaw ba u snem aiu uba kham bha ban ia u snem jubili ksiar ban ioh ia ki Commando Kynthei ba nyngkong eh ka Jylla jong ka SF10.
Ula iaroh ruh ia u DGP bad kiwei ki Ophisar kiba la shim ia ka bynta kaba khraw ha kaban pynkha bad pynthikna ia ka jingdon ki commando kynthei ba nyngkong ka Jylla.
“Kham kongsan eh, nga ai khublei ia ka Meghashakti, nga shu kum pyrkhat ia ki rukom ai jinghikai ba phi hap ban pyndep bad nga thikna ba phi iwei pa iwei phi la lah ban leh bha ha kine ki jinghikai pyntbit, kumba ngi lah ban iohi na ka jinglong discipline bad kiwei kiwei kiba phi la pyni mynta ka sngi” ong u Myntri Rangbah.
Ka Tnad Meghalaya Police, kat kum ka jingong u Myntri kam Pohiing kala iaid ha ka lynti kaba jrong bha ha kine ki 50 snem bala leit. Ula ong ba ki Pulit kila pyni ia ka jingaiti ia ka kam bad ka jinglah ban tem ia kino kino ki jingjia kiba lah ban mih hapoh ka Jylla.
U Myntri kam Pohiing ula pynpaw ruh ba ka jingpynrung ia ki commando kynthei kan dei ruh ka sngi ba kongsan bha jong ka Tnad Pulit.
U la iaroh ruh ia ki commando kynthei ba kila shim ia kane ka kam bad ong ba kine ki commando kin dei ki nuksa ia kiwei pat ki kynthei ha ka Jylla baroh kawei.
