Shillong, Nohprah 27: Kum shi bynta ban kyntiew ia ki sap ba ki samla bad longkmie kynthei ki don, ka Laitlum Dorbar Shnong hynne ka sngi kala pynbna ba kan pynlong daka jingiakop ‘Miss Mawkynrew’ bad ‘Mrs Mawkynrew’ naduh 5 haduh 6 tarik Kyllalyngkot 2023 hapoh ka shnong Laitlum East Khasi Hills.
Haba kren ha kane ka sngi u Sordar ka shnong Laitlum u bah Philip Mylliem u la iathuh ba ia kane ka jingiakop bhabriew la bei tyngka hi da u Myntri ka tnat ka rep ka riang bah Banteidor Lyngdoh u badei ruh u MLA ka Mawkynrew konstitwensi.
U bah Phillip u la ong ba naduh ba la pynlong iaka Mawkynrew Football cup, ki paidbah kila sdang tip bha iaka thain Mawkynrew ym tang namar ka jingdon ki jaka ba itynnad hynrei namar ka jingdon sap ki samla shynrang, kynthei bad longkmie.
U la ong ba kane ka jingpynlong iaka Miss Mawkynrew’ bad ‘Mrs Mawkynrew’ kan nang kyntiew shuh shuh iaka thain baroh kawei bad kane ka jingiakob kan ai lad ruh iaki paidbah ka thain ban pyninam iaka ki sap ki phong ba ki don.
“Ka jingiakob ‘Miss Mawkynrew’ bad ka ‘Mrs Mawkynrew’ kadei tang naka bynta ki samla bad kynthei bad longkmie jong ka thain Mawkynrew” la ong u bah Phillip.
U bah Phillip u la pyntip ba iaki nong ia shim bynta yn bishar katkum ka jingriam tynrai lane ka Traditional, Casual bad ka Common Round lem bad kiwei kiwei de.
