Guwahati, Nohprah 23 :Kumba hynniew ngut ki briew kila shah kem noh hynnin ka sngi halor ka jingsuba donkti ha kaba iadei bad ka jingjia shah rahbor jong kawei ka samla kynthei na ki bynta jong ka sor rit Gohpur ka Assam.
Hadien ba la ioh pdiang ia ka jingujor, na ka liang ki pulit kila pynlong ka jingthwet kaba jur ha ki laitylli ki district ka Assam bad ioh ban kem haduh kumba hynniew ngut ki briew kiba la shah suba donkti.
Haba kren sha ki lad pathai khubor, u SP ka Gahapur, u Naveen Singh ula ong, “Kawei ka briew kala shah rahbor noh na ki bynta jong ka Gohpur ha ka 18 tarik mynta u bnai hadien ba ki pulit kila pynlong ia ka jingthwet kaba 30 kynta kaba kynthup ruh ia ki jingkhynra ha ki bynta jong ka sorbah Guwahati, Udalguri bad Dhekiajuli district.”
Ha ka jingkhynra kaba dang iai bteng, ki bor pulit kila ioh ban kem noh ia hynniew ngut ki runar bad kurup noh ia ki artylli ki kali kamai.
Na ka liang u superintendent of police ka Biswanath district u Naveen Singh ula kren shai ba kino kino ki nongleh kam bymman kin ym lait satia na ki kti jong ka ain.
Lah ban kdew ba ki kam pyntriem pyrshah ia ki kynthei kila nangkiew ha baroh ki bynta jong ka jylla bad ka Assam ka la sakhi haduh kumba 71,061 tylli ki case kam pyntriem pyrshah ia ki kynthei ha kine ki hynriew snem kiba la dep.
Haba aijingkren ha ka iingdorbar assembly ha ka 20 tarik mynta u bnai, u Saikia uba la shim ia ka jingioh jingkhein lyngba ka kaiphod ka NCRB ula pynpaw ba ki kam pyntriem pyrshah ia ki kynthei kila nangkiew bun shah ha u snem 2021 haba ia nujor bad u snem 2020.
U Saikia ula pynpaw ruh ka jingsngewkhia halor ka jingshah khaii jong kiba bun ki kynthei na ka jylla Assam naduh kine ki khyndiat snem ba la dep.
“Ki la don haduh kumba 1,736 tylli ki jingjia shah leh beijot ha ka jylla ha u snem 2020, 3,747 ha u snem 2021.Kumjuh ruh ha u snem 2020, kila don haduh 4,792 ki longkmie bad ki samla bad khynnah kynthei kiba la shah rahbor noh ha ki bynta bapher bapher ka jylla kaba la kiew sha ka 7,691 ngut ha u snem 2021,” ula ong shuh shuh.
