Gangtok, Nohprah 23 :U Myntri Rangbah (CM) barim ka Sikkim u Pawan Chamling ha ka 22 tarik mynta u bnai ula pynpaw ka jingsyier halor ka jingpynpoi ia ki tiar siat napoh Assam bad ki thain Bodoland na ka bynta ban pynphriang ia ki kam pyntriem hapoh Sikkim lyngba u CM ka jylla u Prem Singh Tamang.
Hynnin ka sngi u Pawan Chamling ula kynnoh ia u CM ka jylla u PS Tamang halor ka jingdonkti ha ki kam khaii tiar siat na ka bynta ban pynphriang ia ki kam pyntriem ha ka jylla bad pyrshang ruh ban pynhap hapoh ki kyndon Disturb Area Act 1954 bad kumjuh ha ki kyndon ain ka AFSPA.
Da kaba kynthoh tyngeh pyrshah ia u CM ka jylla u Prem Singh Tamang, u Pawan Chamling u la ong “Da ka hukum ka jongno u CM ka jylla ia uba la tip bha kum u Golay ula kren ha kaba iadei bad ka jingpynphriang ia ki kam lehnoh ha ka jylla, ula leit jngoh ia ka Assam bad ka thain Bodoland, u don ia ki briew ki jong u ha Bodoland bad ula wanphai lyngba ka lynti surok bad haduh mynta ula pynlong ka jingleit jurip haduh laisien kynthih sha kitei ki jaka lyngba ka lynti surok bad na ka liang ka sorkar India ka dei ban pynlong ka jingtohkit kaei kaba u pynkit na kitei ki jaka, kane ka long kaba artatien u lah ban wan kit ia ki tiar siat bad ki kuli namar ki pulit kim talasi ia ki kali jong u CM, balei ka sorkar India ka shu sngap hajar kane? Hato ka Sikkim kam dei ka jylla kaba 22 jong ka ri India?Lane hato yn aiti noh ia ka Sikkim sha ki kynhun lehnoh ne ki seng kieng atiar.Ka RAW, SIB ruh ki dei ban khmih bniah halor kane ka phang.Kane ka Sikkim kam don shuh hapdeng ka jingshngain bad ka don ka jingma kaba khraw na kane ka sorkar.”
Ban pynksan halor kane ka jingkynnoh ka jong u, u Chamling ula ong ba dang ha une u taiew ba la dep la ioh ban kurup santylli ki tiar siat kynthup ia ki kuli hynrei ym shym la don kano kano ka jingrejistar case namar ba kila ioh jingtip ba u trai jong kine ki tiar siat u dei uba shong ba sah ha ka iingsah sorbah jong u CM ka jylla.Na ka liang ki bor pulit ruh kila sngap jar halor kane ka bynta.Ula ong ruh ba ka sorkar pdeng ruh kala tip halor kane bad dei ha kane ka rukom la pynpoi ia ki tiar siat beain sha ka jylla bad na ka liang ka sorkar pdeng ka dei ban shimkhia halor kane ka bynta.
“U CM ka jylla ula byrthen ia ki paidbah da kaba ong ka kynhun jong nga ka long kaba la khreh bad ud ei ban jubab kaei bad iano u thew halor kane ong u Chamling.Da kaei ka jingthmu kaba sha lyndet halor kane ka jingkren ka jong u bad iano u kwah ban pyniap,” ong shuh shuh u Chamling haba kren ha ka jingialang hapdeng ki nongkyrshan ka party hapoh ka headquarter jong ka party hapoh Indira Bye -pass road.
Ha kajuh ka por u Pawan Chamling ula dawa ruh na u CM PS Golay ba un pynpaw ia ka jingai jingkhein kaba bniah ha kaba iadei bad ka jingpyndonkam ia ka pisa ha ka jingiakhun pyrshah ia ka jingpang Covid kumba la leh da ka sorkar SDF barim ha kaba iadei bad ki jingiarap sha ki lanot khynniuh jumai kaba la jia ha u snem 2011.
