Shillong Nohprah 15: Ka sorkar jylla ka la pynkhreh ban plie noh iaka Football Stadium jongka P.A. Sangma Sports Complex haka 16 tarik mynta u bnai, ka ban long ka jingmyntoi iaki nong ialeh kai phutbol ka rilum Garo.
Ia kane ka stadium la sdang ban tei naduh u snem 2006 da u (L) Purno.A. Sangma bad ai kyrteng M.P. Stadium bad kane ka jaka lehkai kala kylla long kum ka jaka ban ialehkai football, athletics bad kiwei kiwei ki jait jingialehkai.
Ha katei ka stadium la pynlong ruh iaka Tura Football League bad iaka Subroto Cup naduh ba la sdang ia ka bad kala long ruh kum ka jaka pdeng kaba kongsan haka jylla haba pynlong ia kano kano ka jingialang ki bym iadei bad ka kam ialehkai kynthup iaka jingrakhe iaka Republic Day bad Independence Day.
Ka jingkyntiew ia kane ka stadium kadei ka kam kaba khia kaba la shim da ka sorkar jylla ia kaba la bei tyngka da ka Ministry of Minority Affairs bad ka Sorkar Jylla.
Kane ka football stadium kadei kaba kynsai tam ha ka ri da ka jingpyndonkam ki kor teknoloji naduh ka por ba pynwandur iaka bad ha kane ka stadium lah ban ngaim haduh 9500 ngut bad kane ka P.A. Sangma Sports Complex ka don ruh 2 tylli ki Indoor Hall kiba ka jingtei ka dang iaid shakhmat, kaba kynthup iaka 25m x 20m Swimming Pool, 6 tylli ki jaka ialehkai Badminton, ka Table Tennis Hall, 4 tylli ki Squash Court, Cafeteria, Office bad kiwei kiwei.
Ka jingtei ia ka Stadium kala sdang ha u Kyllalyngkot 2021 bad wat hapdeng ka jingsaphriang ka khlam jingpang, ka State Sports Council jongka Meghalaya bad ka kynhun kaba tei kila lah ban shna iaka football stadium ban lah ban pyndonkam hapoh ki 2 snem.
Ia katei ka Complex baroh, khlem da kynthup iaka football stadium bad 2 tylli ki Indoor Hall, la tei haka jinglut jingsep kaba kot T.127.7 klur bad ia kine yn sa plie hashwa ban kut u snem 2023.
Ka sorkar ka don iaka jingthrang ban ailad iaki nongshong shnong ka Tura bad ia ki shnong kiba marjan ba kin ioh pyndonkam ia katei ka jaka ialehkai, ha kaba ki Club bad ki Association bad ki riewpaidbah ki lah ban pyndonkam noh mardor ia ki katto katne ki bynta jong katei ka jaka ialehkai hadien ba la dep ban plie paidbah.
Ha ka jingplie ia katei ka Stadium kan don ka jingialehkai Football Paralok hapdeng ka jylla Meghalaya pyrshah iaka North East United Football Club, ka n don ruh ka cultural prokram, ka drone show bad ka jingthang ia ki bom pataka.
U Myntri Rangbah ka jylla u Conrad K. Sangma yn long u Kongsan bad u Myntri ka tnad ka koit ka khiah u James PK Sangma yn long kum u kongsan symbud ha katei ka sngi.
Ha ka Chandmari Stadium la sdang ruh ban pynlong iaka jingai jinghikai bad ia ki jingialehkai bad nalor kane, ka jingtei iaka Track and Field bad iaka Indoor Stadium ha Sunny Hill ka dang iaid shakhmat.
Ka sorkar kala shimkhia ruh ha kaban pynbha iaki jaka ialehkai kiba don ha kylleng jongka jylla bad ka jingkyntiew bad jingshna iaka JN Stadium Polo Ground, Shillong yn pyndep noh ha u Lber 2023.
Ka jingtei iaka Indoor Stadium kaba kyrpang ka dang iaid shakhmat kaba kynthup iaka shooting range, badminton court, basketball court bad kiwei kiwei .
Ka Wahiajer Stadium kaba don hajan Jowai kadei sa kawei ka jaka ialehkai kaba yn sa plie noh ha u Kyllalyngkot 2023.
Naduh ba la sdang pyntreikam iaka Meghalaya Sports Policy ha u 2019, ka tnad Sports and Youth Affairs kala shimkhia ha kiba bun ki bynta na ka bynta ia ka kam ialehkai bad ban pynshlur ia ki samla ka jylla da kaba iatreilang bad ka Meghalaya State Olympic Association.
Ka jingpynlong biang iaka Meghalaya Games hadien 16 snem kala ai mynsiem ia kiwei pat ki jylla ba kin bud ia ki nuksa bad ban sdang pynlong iaka jingiakob ialehkai kiba heh bad ka jingpynlong ia 2nd North East Olympic Games kala long kaba jop khamtam haba ki nongialehkai ka jylla kila paw bha bad ka long ka jingsarong iaka jylla. Ki nongpyniaid ia katei ka lympung iakob bad ka tnad Sports and Youth Affairs kila ioh iaka jingiaroh na ki jylla kiba la wan ba niashimbynta bad kumjuh ruh na ki lad pathai khubor jong ka ri India.
Ka sorkar kala ai jingiarap da ka pisa bad Scholarship skim ia ki nongialehkai ka jylla kiba la jop ha ki jingialehkai ha kaba palat 4 Klur tyngka la dep ban sam sha ki 2000 ngut tang mynta u snem.
Da kaba iatreilang bad ka Meghalaya State Olympic Association, ka sorkar jylla kala sdang ruh iaka STAR Talent Identification Program, ha kaba 200 ngut ki khynnah na kylleng ka jylla Meghalaya kila shah jied kum ki nongialehkai kiba kynsai lyngba ka Scientific Testing bad kitei ki nongialehkai kin hap ban pyndep iaka jingioh jinghikai ba kin kiew shaphrang.
Ia kitei ki prokram bad skhim la pyntreikam da ka tnad Department of Sports and Youth Affairs da ka jingthmu ban kyntiew iaka kam ialehkai bad ia ki nongialehkai kiba don sap don phong khnang ba kin lah ban long ki khlur ialehkai kiba mih naka jylla ha ki jingiakob haka National bad International.
