Nongpoh, Nohprah 13: Ka kynhun Caring Cohorts kaba dei kawei naki kynhun ki shi paralok, kaba ju trei mon sngewbha naka bynta ka bha ka miat jong ka imlang ka sahlang bad kaba ju kner la ki kti jingïarap ïa kiba donkam ka jingïarap mynta ka sngi ba-ar kala sdang ïaka tamasa tlang lane ka Winter Festival ba 3 sngi lynter ha madan Umsning.
Ïa katei ka tamasa tlang la wan ban plie pyrda da u Bah Donlang Sohkhlet kum u kongsan, u Bah Bipul Thangkhiew President ka RBYF kum u symbud kongsan ha ka jingiadonlang u Raja Brahma BDO ka Umsning C&RD Block, Bah Rocky Kylla Chairman ka Umsning Town Dorbar, Bah Rocky Marweiñ Rangbah Shnong ka Umsning Proper B, ka kong Balakyntiew Umbah Head Mistress ka Sati Raja Memorial Secondary School bad kiwei kiwei.
U President ka Caring Cohorts Samla Silvester Mawthoh u la pynpaw ba kum ka kynhun ki shiparalok da kawei ka mynsiem ban peit ïaka khia ka shon hapoh ka imlang sahlang bad ruh ban kyrshan ïaki katto katne ki shlem ai jinghikai, ha kane ka sien ka ba nyngkong ki la jied ïaka Sati Raja Memorial Secondary School Umsning kaba dang don hapdeng shibun ki jing duna naduh ki kamra Klass haduh ka surok bad bun kiwei ki jingduna .
Ula ong ba dei halor katei ka nongrim kila rai ban pynlong da ka tamasa lehkmen kaba la tip kum ka Winter Festival kaba 3 sngi lynter bala sdang naduh mynta ka sngi ban pynmih pisa sha kane ka skul.
Kum ban shu pynpaw ba ïaka skul Sati Raja Memorial Secondary School la seng naduh u snem 2004 da u Bah OB Ranee (Bam kwai ha dwar u Blei) u ba dei ruh u nongïalam jong ka RAWA ban pynphriang ïaka jing nang jingstad ïaki khynnah ka thaiñ Umsning.
