Shillong, Nohprah 09: U MLA ka Mawlai Constituency Bah Process T Sawkmie hynne ka sngi Thohdieng u la dawa ba dei ban pynshitom mardor ia ki Pulit ba don hapoh ka Tactical Team-I kaba la paw ha ka kaiphot jingtohkit jong u Chief Justice barim ka Meghalaya High Court u T. Vaiphei ba ka donkti haba siat iap ia u bah Cherishterfield Thangkhiew.
U bah Sawkmie u pynpaw ba ka jingpynslem ka sorkar ban pynshitom ia kine ki Pulit ba donkti ka la pynlong ia Ka Sur Bri Hynniewtrep ba kan mih biang shakhmat ban dawa pynshitom ia kito kiba siatiap ia u bah Cherish, kaba la jia ha ka step 13 tarik Nailar 2021.
U ong, “Hooid ka longiing u bah Cherish ki la pdiang ia ka jingtohkit jong u Vaiphei, hynrei kim hun pat namar ba ki kwah ban pynshitom ia ki briew kiba donkti.”
Haduh mynta ka sorkar kam pat pynshitom ia kiba don ha ka Tactical Team bad ka sorkar ka don por sa tang ar taiew eiei, kumta ka dei ban pynshitom noh ia ki, dawa u bah Sawkmie.
Une u MLA u la pynpaw ia ka jingsngewlyngngoh ba ka sorkar ka slem ban pynshitom bad ong ba kane ka paw shai ba ka sorkar kam don ia ka mon ban pynshitom bad ka pyrshang ruh ban buhrieh ia ka kyrteng jong kiba don bynta haba shim ia ka jingim u bah Cherish.
Kumba shu kdew u bah Cheristerfield Thangkhiew, u dei u general secretary barim ka HNLC uba la wan pyndem sha ka sorkar shuwa ba kane ka jingshah siatiap kan jia.
