Shillong, Nohprah 09: Ka FKJGP-Mawprem Circle kala dawa ia ka tnad Public Works Department (PWD) (Roads) ba kan pyntrei bad siang rong noh ia ka surok ha shilynter ka Shnong Mawprem, kaba la jot na ka jingwan thep pipe um jong ka Tnad Publich Health Engineering (PHE).
Ka FKJGP-Mawprem ha ka jingialam u President Bah Reginald Thabah, kala buh ia kane ka jingdawa hakhmat jong u Executive Engineer ka PWD (Roads) Bah Kharmyndai, ha ka jingleit iakynduh markhmat hynne ka sngi thohdieng.
Kane ka Seng kala dawa ia ka Tnad PWD ba kan shna bad siang rong noh ia ka surok naduh KHADC, Lower Mawprem bad Lumkshaid namar ka jingiehshrah hadien bala tih ban thep pipe um, kala ktah shikatdei eh ia ki paidbah nongleit nongwan bad kumjuh ruh ia ki Nongshongshnong namar ka jingpumpum kaba ia ishyrkhei.
Kat kum ka jingong ka Seng, ka Tnad PHE kala dep ban thep pipe la kham slem hynrei ban pynbha ne maramot pat ia ka surok kala shimpor shaba palat.
La iathuh ba ha ka jingiakren bad ka tnad PWD, la lap ba ka jingpyntrei bad maramot ia ka surok la aiti ia ka kam ha u Contractor ka Tnad PHE uba theh ia ki pipe um.
“Ngi dawa ban pyntrei bad maramot noh ia ka surok shuwa ka 25 tarik Nohprah, 2022” ong ka FKJGP.
