Shillong, Nohprah 09 : Ka Sorkar Jylla kala pynjlan sa 45 sngi ka por bala ai sha ki lai tylli ki Regional Committee pynbeit pud, ba kin aiti ia ki kaiphod.
Ia kane la pyntip da u Chief Secretary ka Jylla Bah DP Wahlang.
Kine ki Regional Committee ki dei kiba la thaw ha ka 26 tarik Nailur ban song bishar ia ka jinglong jingman jong ki hynriew tylli ki jaka iakajia pud ba dang sah bad ka Assam bad ban aiti ia ka kaiphod hapoh ka 45 sngi.
Kine ki jaka ba iakajia ki kynthup iaka Langpih ha West Khasi Hills District, Borduar, Nongwah-Mawtamur, Deshdoomreah, Block-II kiba don ha Ri-Bhoi bad ka Block-I, Psiar-Khanduli kiba hap ha West Jaintia Hills District.
Kine ki Regional Committee ba hynriew ngut ki dkhot ki kynthup ia ka Ri-Bhoi bala khlieh da u Symbud Myntri Rangbah ka Jylla Bah Prestone Tynsong kum u Chairman, ka West Khasi Hills bala khlieh da u Myntri ka PHE Bah Renikton Lyngdoh Tongkhar kum u Chairman bad ka Jaintia Hills bala khlieh da u Myntri pynroi sor ma Sniawbhalang Dhar kum u Chairman.
Ka jingpynbna ba 26 tarik Nailur ka ong “Ki Committee kin aiti ia ki kaiphod sha ka Sorkar Meghalaya hapoh ka 45 sngi ba pynmih ia kane ka jingpynbna, ka ban pynshong nongrim na ki jingleit jurip ia ki Shnong bad haba pynshong nongrim ha ka nongrim bala mynjur lang halor ka histori, ka jingdon jong ki jaidbynriew ba shongshnong, ka jingsngew suk ki paidbah ban ioh ia ka jingshakri ka Sorkar, bad ka mon jong ki paidbah ka thain”.
Lah ban kdew hangne ba baroh lai tylli ki Regional Committee kila dep shong ia ki jingialang ba nyngkong jong ki Dkhot bad dep khot ruh ia ka jingialang bad ki kynhun bapher bapher ban iamir jingmut halor ki sienjam ban shim ha ka jingiapynbeit pud jong ka wat kaba ar bad ka Assam.
