Shillong, Nohprah 09: U MLA ka Mawlai Constituency Bah Process T Sawkmie hynne ka sngi Thohdieng u la pynpaw ia ka jingsngewkmen naduh ka mynsiem ia ka hukum jong ka Iingkashari Meghalaya High Court haba ia dei bad ka jingbthah ban ym pat dei ban iaphiah ne iasieh mawpud ha ki jaka bala dep iapynbeit pud hapdeng ka Meghalaya bad ka Assam.
“Nga sngewkmen shikatdei eh ba ka Iingbishar Meghalaya High Court ka la phah pynsangeh shuwa ia ka jingphiah pud ne sieh mawpud ha ki jaka ba iakajia,” ong u Bah Sawkmie.
U la bynrap, “Kane ka paw shai ia ka jingpheil ka sorkar haba ia dei bad ka Memorandum of Understanding (MoU) ne ka soskular kaba kine ki ar tylli ki jylla ki la iasoi hapdeng jong ki.”
U pynpaw ba naduh ka por ba soi ia ka MoU u sngewthuh ba kam biang satia namar ba bun ki jaka ki leit sha Assam bad bun ki sengbhalang bad kumjuh ki Khlieh Nongsynshar ki pynpaw ia ka jingbym sngewhun jong ki haba ia dei bad kane ka jingiapynbeit pud.
U pynpaw ba ka sorkar ba thymmai kaban wan ha u 2023 kan hap ban pynduh pyndam ia ka MoU jong ka wat pynbeit pud ba nyngkong hapdeng ka Meghalaya bad Assam.
Kumba shu kdew ka iingbishar Meghalaya High Court ka la pynmih ia ka hukum ba ym dei ban sieh mawpud ha ki jaka iaknieh hapdeng ka Assam- Meghalaya tad haduh ka 6 tarik Rymphang, 2023.
Katkum ka hukum ka iing bishar ka la pynpaw ha kum kane khep kam dei ban don ka jingpynbeit ia u pud lane pynieng mawpud ha kitei ki jaka halor ka MoU ba la soi ha ka 29 tarik Lber 2022 tad haduh ban shong bishar biang.
Ka Iingkashari ka la buh sngi ban bishar biang ia kane ka mukotduma ha ka 6 tarik Rymphang, 2023.
