Guwahati, Nohprah 07 :Uwei u dkhot jong ka kynhun seng lehnoh United Liberation Front of Asom-Independent (ULFA -I) kaba la shah khein beain ula khlad noh hapoh ka ktem jong kane ka kynhun hadien ka jingshitom kaba la ban la kham slem.
Ia une u lanot la tip kyrteng kum u Jugal Sarma uba dei na ka sorbah Guwahati.Lah ban kdew ba une u dkhot 30 snem rta u dei na ki bynta jong ka Noonmati bad ula leit pyniasoh ialade bad katei ka kynhun kieng atiar dang ha u bnai Lber jong ka snem ba la dep.
Haba pyllait khubor halor kane ka jingjia, katei ka kynhun kieng atiar kala ong; “U dkhot jong ka seng u Jugal Sarma ia uba la tip ruh kum u Private Asom ula khlad noh hadien ka jingshitom kaba la ban la kham slem ha kane ka step sngi U Blei ba la lah. U dei uba dang thymmai bad u dei u dkhot ba 20,759 jong ka kynhun.Na ka liang ka ULFA (I) ka pynpaw ka jingsngewlem halor kane ka jingkhlad noh ka jong u.”
Lah ban kdew ba ka seng ULFA(I) kala pynbna ia u Jugal Sharma kum u‘Amar Mritak’ halor ka jingnoh synniang ka jong u ha kaba iadei bad ka jingialeh jong ka kynhun na ka bynta ban pynioh jinglaitluid ia ka Assam.
“Halor kane ka jingkhlad noh ka jong une u dkhot, ka ULFA(I) ka pynpaw ka jingsngwsih bad ka phah ruh ka jingsngewlem sha kiba haiing hasem ki jong u.U Jugal ula wan pyniasoh sha ka seng na ka bynta ban pynioh pat ia ka jinglaitluid kaba la duh noh bad ban wanrah ia ka jingiaieit na ka bynta ka ri ka jong u,” ong shuh shuh ka jingthoh.
Ha kawei pat ka bynta, na ka liang ki bor pulit ka Assam kila sdang ban pynlong ia ki jingkhynra ban lapdien ia ki tyllong kiba iadei bad ki kam bei tyngka sha katei ka kynhun seng lehnoh.
Lah ruh ba kdew ba kane kala wan jia hadien ba ki pulit ka Assam dang shen kila ioh ban kem noh ia sawngut ki briew kaba kynthup ia u briew uba don jingiadei bad katei ka kynhun kieng atiar ha kane ka taiew ba la dep.
